"ვერავინ ივარაუდებს რა აქვს დაგეგმილი ქალბატონ ბენსუდას"- წულუკიანი სკანდალური განცხადების შემდეგ განმარტებას აკეთებს

პოლიტიკა - 10:27, 16 Nov, 2018

1747

აგვისტოს ომის მონაწილე ქართველი სამხედროების შესაძლო გასამართლებასთან დაკავშირებით სკანდალური განცხადების გაკეთების შემდეგ, საქართველოს იუსტიციის მინისტრი განმარტებას აკეთებს. თეა წულუკიანის თქმით, ვერავინ ივარაუდებს რა აქვს დაგეგმილი სისხლის სამართლის საერთაშორისო სასამართლოს პროკურორს ფატუ ბენსუდას და რა გამოძიება ჩაატარა მან, თუმცა წულუკიანის მტკიცებით, საქართველოს ხელისუფლება ყველაფერს აკეთებს რათა ქართული ჯარის ღირსება დაცული იყოს:

"რა თქმა უნდა, დღეს ვერავინ ივარაუდებს, რა აქვს დაგეგმილი ქალბატონ ბენსუდას, რა საგამოძიებო მოქმედებები ჩაატარა, ეს მხოლოდ იცის მან და მისმა გამომძიებლებმა, ამიტომ ჩემთვის ყოვლად გაუგებარია "ნაციონალური მოძრაობის" ყიჟინი ამ თემაზე. მე ერთადერთი ის შემიძლია ვთქვა რაც ვიცი, ვიცი ის, რომ საქართველოს "ქართული ოცნების" მთავრობა, "ნაციონალური მოძრაობის" მთავრობისგან განსხვავებით, ყველაფერს აკეთებდა და აკეთებს იმისთვის, რომ ჩვენი ჯარის ღირსება იყოს დაცული, რომ ანწუხელიძის, სოფრომაძის და სხვების საქმეები და ეპიზოდები გამოვაძიებინოთ, თუ ეს შეიძლება, მტკიცებულებების შეგროვებით შევძლოთ რომ ბენსუდამ დააყენოს რუსი სამხედროების და ასევე იმ ოსი მათი წარმომადგენლების პასუხისმგებლობის საკითხი, ვინც შესაძლოა ქართველების ეთნიკურ წმენდაში იყო ჩართული. დანარჩენი ყველაფერი, რასაც აკეთებს "ნაციონალური მოძრაობა," ეს არის პოლიტიკური ინსტრუმენტაცია."- განაცხადა თეა წულუკიანმა.