პოლიტიკური თვითმკვლელობა: აგვისტოს ომზე ზურაბიშვილისა და უმრავლესობის წამოსროლილი სიტყვები ქვეყანას ძვირი დაუჯდება

პოლიტიკური თვითმკვლელობა: აგვისტოს ომზე ზურაბიშვილისა და უმრავლესობის წამოსროლილი სიტყვები ქვეყანას ძვირი დაუჯდება - მოსამართლე წოწორია

პოლიტიკა - 15:55, 15 Nov, 2018

2015

მოსამართლე ნონა წოწორია, რომელიც წლების განმავლობაში სტრასბურგის ადამიანის უფლებების დაცვის სასამართლოში საქართველოს წარმოადგენდა, როგორც ეროვნული მოსამართლე, ამბობს, რომ განცხადებები - „ომი დაიწყო საქართველომ“ და "სააკაშვილმა მძინარე ცხინვალი დაბომბა“ შეიძლება საქართველოს საკმაოდ ძვირი დაუჯდეს.

მისი თქმით, მსგავს განცხადებებს რუსეთი ჰააგას სასამართლოში აქტიურად გამოიყენებს საქართველოს წინააღმდეგ.
წოწორიამ "რუსთავი 2"-ს უთხრა, რომ ამ შინაარსის განცხადებები როგორც სალომე ზურაბიშვილისთვის, ასევე, სხვა მაღალი თანამდებობის პირებისთვის თვითმკვლელობის ტოლფასია.

„იმის გათვალისწინებით, რომ ეს არის ძალიან დიდი და სამართლებრივი ბრძოლა, რომელიც საქართველოს მოუწევს, საჭიროა, გააცნობიერონ პოლიტიკოსებმა, რომ ასე წამოსროლილი სიტყვების გამოყენება ქვეყანას, შეიძლება, ძალიან ძვირად დაუჯდეს. პოლიტიკოსები, რომლებიც ამ საკითხებით მანიპულირებენ თუ ამ საკითხებს იყენებენ საკუთარი პოლიტიკური პოზიციის გასამყარებლად, უნდა იცოდნენ, რომ ეს იმდენად სახიფათოა ქვეყნისთვის, რომ უნდა დაუჯდეთ პოლიტიკური ფასი. ეს უნდა იცოდნენ, რომ არის ფაქტობრივად პოლიტიკური თვითმკვლელობის ტოლფასი. თუ არ ვიმუშავეთ კარგად ჰააგაში და მე შეშფოთებით ვადევნებ თვალ-ყურს იმ განცხადებებს, რომელიც ახლა ჰააგაში მიმდინარე პროცესს ეხება, არავინ იცის, იქ რა განაჩენი შეიძლება დადგეს. იქ ფაქტების როგორ შეიძლება აისახოს. შესაბამისად, თუ კარგად არ ვიმუშავეთ, შეიძლება აღმოჩნდეს, რომ ამ ფაქტების ასახვამ ჰააგის სასამართლოში, რომელიც საქართველოსთვის შეიძლება არ იყოს სასარგებლო, შეიძლება გამოიწვიოს გარკვეული ცვლილებები ასევე, სტრასბურგის სასამართლოსთვისაც,“-განაცხადა ნონა წოწორიამ.