საქართველოს შესახებ მომზადებულ რეზოლუციას ევროპარლამენტში კენჭს დღეს უყრიან - „საპრეზიდენტო არჩევნებზე ვნახეთ ზეწოლა სამოქალაქო საზოგადოებასა და სადამკვირვებლო ორგანიზაციებზე“

პოლიტიკა - 10:23, 14 Nov, 2018

870

საქართველოს მიერ ასოცირების შეთანხმების შესრულების შესახებ ანგარიშს ევროპარლამენტში კენჭს დღეს უყრიან. ჯერჯერობით უცნობია, შევა თუ არა დოკუმენტში შესწორებები, რომელიც საპრეზიდენტო არჩევნების პირველ ტურს, ადმინისტრაციული რესურსის გამოყენებას და ხელისუფლების მხრიდან არასამთავრობო სექტორზე თავდასხმას უკავშირდება.

ევროპარლამენტის პლენარულ სესიაზე 13 ნოემბერს საქართველოს მიერ ასოცირების შეთანხმების შესრულების შესახებ ანგარიში განიხილეს, რომლის ავტორიც ევროპარლამენტის დეპუტატი ანდრეს მამიკინსია. ანგარიშთან დაკავშირებით დებატები დაახლეობით ერთი საათის განმავლობაში მიმდინარეობდა. დებატების დროს აღინიშნა, რომ საქართველომ დემოკრატიული რეფორმების გატარება უნდა გააგრძელოს. ევროპარლამენტარებმა მოუწოდეს კომისიას, წევრ სახელმწიფოებს, რომ უფრო მეტად დამკვიდრდეს ტერმინ ოკუპაციის გამოყენება.

„ასოცირებულ ქვეყნებში ხანგრძლივი დემოკრატიისა და მშვიდობის განვითარება, ევროპის კონტინენტის გაერთიანების პროცესის მნიშვნელოვანი ნაწილია, რომელიც საბჭოთა კავშირის დაშლის შემდეგ დაიწყო. ეს რთული პროცესია არა მხოლოდ მხოლოდ საბჭოური გადმონაშთების, არამედ ოლიგარქიის 20-წლიანი გავლენის გამო. ასოცირების შეთანხმება საქარველოს დაეხმარება წარმატების მიღწევაში, თუკი სასამართლოს სისტემისა და უსაფრთხოების სამსახურების სისტემატიური რეფორმირება მოხდება, დაცული იქნება უმცირესობების უფლებები."- განაცხადა ევროპარლამენტარმა რებეკა ჰარმსმა.

ევროპარლამენტის დეპუტატმა ფაბიო კასტალდომ ყურადღება გაამახვილა საქართველოს ხელისუფლებისა და არასამთავრობოების ურთიერთობაზე და განაცხადა, რომ საპრეზიდენტო არჩევნებზე მესამე სექტორსა და სადამკვირვებლო მისიებზე პოლიტიკოსების მხრიდან ზეწოლა განხორციელდა.

"საქართველოში საპრეზიდენტო არჩევნებზე ჩვენ ვნახეთ ზეწოლა სამოქალაქო საზოგადოებაზე პოლიტიკოსების მხრიდან. ასევე ზეწოლა სადამკვირვებლო ორგანიზაციებზე, რომლებიც ფაშიზმში მხოლოდ იმის გამო დაადანაშაულეს, რომ ისინი საკუთარ სამუშაოს ასრულებდნენ. სამოქალაქო საზოგადოების დაცვა ევროკავშირსა და საქართველოს შორის კონსტრუქციული პარტნიორობისთვის გადამწყვეტი პირობაა და ამას ჩვენ კიშინიოვშიც და თბილისშიც ვიტყვით."-განაცხადა კასტალდომ.