თბილისის საკრებულოს დეპუტატები დღევანდელ სხდომაზე ერთმანეთს საპრეზიდენტო არჩევნებთან დაკავშირებით დაუპირისპირდნენ, „ქართული ოცნების“ წევრის რიმა ბერიძის თქმით, ოპოზიცია არჩევნების მოგებას ვერ შეძლებს, რადგან ხალხი მათ ვერ იტანს:

„აანონსებთ რევოლუციას, აანონსებთ დესტაბილიზაციას. თქვენი ექსპრეზიდენტი, გიჟი რომ გყავთ უკრაინაში, ნახეთ მისი გზავნილები, ნახავთ, ვინ წააგებს არჩევნებს. იცით, რა არის საქართველოს მოსახლეობის დაკვეთა? არ უნდიხართ, ვერ გიტანენ, ხალხი მეხვეწება, გააქტიურდით ქალბატონო რიმაო. საზოგადოების დაკვეთა არის ზუსტად "არა ნაციონალურ მოძრაობას!". ამას გეტყვით მეორე ტურის შემთხვევაში,“ - განაცხადა რიმა ბერაძემ.

ნაციონალური მოძრაობის წევრმა ირაკლი ნადირაძემ მმართველ გუნდს არჩევნების პირველი ტურში მიღებული შედეგი გაახსენა და ის მიზეზები შეახსენა, რის გამოც ქართულმა ოცნებამ არასასურველი შედეგი მიიღო.

„მესმის თქვენი გაღიზიანება ამ წაგებული არჩევნების შემდეგ და თქვენ დიახ, წააგეთ ყველა დიდი ქალაქი და მათ შორის, დედაქალაქი. თუმცა, მე არჩევნებზე არ ვლაპარაკობ. მოგიწოდებთ ქართული ოცნების დეპუტატებს, გთხოვთ, ავწიოთ ყველამ ხელი, ვინც თვლით, რომ რუსეთი ოკუპანტია და ომი დაიწყო რუსეთმა და არა საქართველომ,“ -განაცხადა ირაკლი ნადირაძე, თუმცა მის ამ მიმართვაზე ხელი ყველას არ აუწევია და მიზეზად დაასახელეს, რომ ნადირაძის მითითებების შესრულებას არ აპირებდნენ.