"დაწერე, რომ წაიქეცი და დავხუროთ საქმე"- ავარიაში მოყოლილ მოქალაქეს გამოძიების მიმდინარეობასთან პრეტენზიები აქვს

პოლიტიკა - 19:23, 13 Nov, 2018

2275

ფეისბუკმომხმარებელი გოგი ხოჭოლავა ვიდეომიმართვას ავრცელებს, სადა ის საუბრობს იმის შესახებ, რომ შსს-ს არ სურს იმ საგზაო შემთხვევის გამოძიება, რომელშიც ის დაზარალდა და გამომძიებელი მისგან მოითხოვს, რომ დაწეროს, თითქოს ის ავარიაში არ მოყოლილა და დაზიანებები მოპედით წაქცევის დროს მიიღო.

ხოჭოლავას თქმით 11 ნოემბერს დაახლოებით 16:30 საათზე გმირთა მოედნის ესტაკადაზე იმყოფებოდა მოპედით, რა დროსაც შავმა ტოიოტამ საავარიო სიტუაცია შეუქმნა და ადგილიდან მიიმალა.

მძღოლი ცოტა ხნით კი გაჩერდა, დაინახა ჩემი უძრავი სხეული, ალბათ ეგონა გარდავიცვალე და მიიმალა ადგილიდან. დაზიანებული მაქვს ნახევარი სხეული, ამოგდებული მაქვს მხარი, იდაყვი, კუნთები მაქვს დაბეჟილი, ნეკნები დამტვრეული. ამ მდგომარეობაში ორი დღის თავზე დამიბარეს გამომძიებლებმა და ვიყავი პოლიციაში. გამომძიებელმა მითხრა, რომ ადგილზე სხვა მოწმეების ჩვენებები არ აიღეს.გამომძიებელი დამცინავად მეუბნება, რომ ჩვენ ამ საქმეს ვერ გამოვიძიებთ, უბრალოდ დაწერე, რომ წაიქეცი მოპედით და დავხუროთ საქმე. არ ვაპირებ არანაირი საქმის დახურვას, თუ ვინმე იურისტი ხართ, დამიდექით გვერდში" - აცხადებს ხოჭოლავა გავრცელებულ ვიდეოში.

ხოჭოლავა ვარაუდობს, რომ ადამიანი, ვინც მას დაეჯახა, შინაგან საქმეთა სამინისტროს თანამშრომელია და მას ხელს აფარებენ.

შსს-ს ინფორმაციით, აღნიშნულ საქმეზე გამოძიება სისხლის სამართლის კოდექსის 276-ე მუხლის პირველი ნაწილით მიმდინარეობს. უწყება აცხადებს, რომ თუ მოქალაქეს გამოძიების მსვლელობასთან დაკავშირებით პრეტენზიები აქვს, მას შეუძლია გენინსპექციას ან საქართველოს მთავარ პროკურატურას მიმართოს.