ეროვნული ბანკის მიერ დაანონსებული ახალი საბანკო რეგულაციების ამოქმედებამდე ორი დღე რჩება - სებ-ის მიერ დაწესებული რეგულაციები მსოახლეობას სესხის აღების პროცესს საგრძნობლად გაურთულებს. თავდაპირველად რეგულაციები 1 ნოემბრიდან უნდა შესულიყო ძალაში, თუმცა ეროვნულმა ბანკმა რეგულაციების ამოქმედება 15 ნოემბრამდე გადადო. ​საბანკო სექტორის წარმომადგენლები რეგულაციების კიდევ ერთხელ გადავადებას ითხოვენ და თარიღად 1 იანვარს ასახელებენ.

„საბანკო ასოციაციის სურვილია, რომ ისე, როგორც მიკროსაფინანსო ინსტიტუტებში ეს ახალი რეგულაციები ძალაში შევიდეს პირველი იანვრიდან, ვნახოთ, როგორ ამოქმედდება,“ - ამბობს „თიბისი ბანკის” გენერალური დირექტორი ვახტანგ ბუცხრიკიძე.

რეგულაციების ამოქმედების 1 იანვრამდე გადავადების აუცილებლობას განმარტავს "საქართველოს ბანკის" გენერალური დირექტორი:

„მნიშვნელოვანია ცვლილებები, რომლის დანერგვაც დიდ სისტემურ ბანკებში დრო სჭირდება. ძალაში შესვლამდე იყოს გარკვეული პერიოდი, ორი კვირა იქნება თუ ერთი თვე, რომელიც საშუალებას მისცემს ბანკებს, დანერგოს თავიანთ სისტემებში ეს ახალი რეგულაციები, რომლებიც შემოვა,“ - განაცხადა კახა კიკნაველიძემ.