პარლამენტის საგარეო ურთიერთობათა კომიტეტზე ცხარე კამათის ფონზე მიმდინარეობდა ჰააგის სასამართლოში მიმდინარე პროცესი, რომელიც რუსეთ-საქართველოს აგვისტოს ომს ეხება. „ევროპული საქართველოს“ წევრმა მმართველ გუნდს შეახსენა, რა ზიანი მიაყენა საქართველოს სალომე ზურაბიშვილის განცხადებებმა და მის წიგნში დაწერილმა მემუარებმა.

საპარლამენტო ოპოზიცია აღნიშნულ საკითხზე კითხვებზე პასუხების გასაცემად პარლამენტში თეა წულუკიანისა და დავით ზალკალიანის მისვლას ითხოვს:

„რუსეთის ფედერაციას გამოყენებული აქვს სალომე ზურაბიშვილის სიტყვები მტკიცებულების სახით საქართველოს წინააღმდეგ საქართველოს საზღვრების შესაცვლელად. ეს უკვე ფაქტია. ის მოსმენა, რომელიც უნდა გაიმართოს, მოსმენაზე უნდა მოვიდეს იუსტიციის მინისტრი, რომელმაც უნდა გვითხრას, რატომ არ დგამს საქართველო იმ ნაბიჯებს, რომელიც მას დაავალა ამ სასამართლომ, საერთაშორისო მართლმსაჯულების სასამართლომ 2009-10 წლებში და რატომ არის შეჩერებული ეს საკითხი საერთაშორისო მართლმსაჯულების სასამართლოში, რომელიც ეხება ჩვენი დევნილების დაბრუნების, ეთნიკური წმენდის აღმოფხვრის საკითხს,“- განაცხადა გიორგი კანდელაკმა.