ჟურნალისტმა ნანა ჟორჟოლიანმა სმიტების ოჯახის მკვლელობაში ბრალდებულის დედას სიმართლის დამტკიცებისთვის ბრძოლაში გამძლეობა უსურვა, ეს არის ენმ-ს სახე- ირაკლი კობახიძე

პოლიტიკა - 18:11, 12 Nov, 2018

1461

საქართველოს პარლამენტის თავმჯდომარის თქმით, „ნაციონალური მოძრაობა“ და მათი მხარდამჭერები ადამიანების უბედურებით სპეკულირებენ. აღნიშნული განცხადება ირაკლი კობახიძემ დღეს ბიუროს სხდომაზე გააკეთა. კობახიძემ ხადას ხეობაში მომხდარ მკვლელობასთან დაკავშირებით, გადაცემა "ნანუკას შოუში", ბრალდებულის დედის მონაწილეობაზე ისაუბრა. და გაანცხადა, რომ გადაცემის წამყვანმა ნანუკა ჟორჟოლიანმა მკვლელობაში ბრალდებულის დედას სიმართლის დამტკიცებისთვის ბრძოლაში გამძლეობა უსურვა.

„ამას წინათ, გადაცემა იყო „რუსთავი 2“-ზე, „ნაციონალური მოძრაობის“ პარტიულ ტელევიზიაში. ერთ-ერთ აქტივისტსა და ჟურნალისტს, ნანა ჟორჟოლიანს მიჰყავდა გადაცემა და მან მოიწვია ეთერში ერთ-ერთი ბრალდებულის დედა. საქმე ეხება ამერიკელების მკვლელობას. სამი ადამიანი, ბავშვი და ცოლ-ქმარი მოკლეს ხადას ხეობაში. ნანა ჟორჟოლიანს ჰყავდა მიწვეული ბრალდებულის დედა და დასასრულს, მან ბრალდებულის დედას გამძლეობა უსურვა სიმართლის დამტკიცებისთვის ბრძოლაში. აი, ეს არის „ნაციონალური მოძრაობის“ სახე. არ შეიძლება ყველაფრით სპეკულირება, არ შეიძლება სპეკულირება, მაშინ როდესაც ვიღაც კლავს ამერიკელ ცოლ-ქმარს და მის არასრულწლოვან ბავშვს. არ შეიძლება სპეკულირება შვილმკვდარი მამების უბედურებით. ეს არის უბედური სახე „ნაციონალური მოძრაობის“. არ მინდა მომავალში ამ სახის წარმოდგენაც კი. ეს არის ნანა ჟორჟოლიანის და „ნაციონალური მოძრაობის“ სახე და მინდა, ძალიან კარგად ჩაიხედოთ სარკეში.“- განაცხადა ირაკლი კობახიძემ.