გახარია პარლამენტში ხორავას ქუჩაზე მომხდარი მკვლელობის საქმეზე მოხსენებით წარსდგება

პოლიტიკა - 17:01, 12 Nov, 2018

773

საქართველოს პარლამენტის თავმჯდომარის თქმით, შინაგან საქმეთა სამინისტრო მზად არის, ნებისმიერ დროსა და ადგილზე წარადგინოს მოხსენება ხორავას ქუჩაზე მკვლელობის საქმის შემსწავლელი დროებითი საგამოძიებო კომისიის რეკომენდაციების შესრულებაზე. როგორც ირაკლი კობახიძემ დღეს ბიუროს სხდომაზე განაცხადა, ამის შესახებ ის გიორგი გახარიას ესაუბრა.

„დღეს დილით მქონდა საუბარი შინაგან საქმეთა მინისტრთან, გიორგი გახარიასთან და მან განაცხადა, რომ შინაგან საქმეთა სამინისტრო მზად არის, ნებისმიერ დროს, ნებისმიერ ადგილას წარადგინოს მოხსენება ხორავას ქუჩაზე მკვლელობის საქმის შემსწავლელი საგამოძიებო კომისიის მიერ გაცემული რეკომენდაციების შესრულების თაობაზე.“ – განაცხადა კობახიძემ.

დღეს, პარლამენტის ბიუროს სხდომაზე, საპარლამენტო უმცირესობამ რეზოლუცია შეიტანა, რომელიც ხორავას ქუჩაზე მომხდარი მკვლელობის საქმეზე საგამოძიებო კომისიის მიერ შემუშავებული რეკომენდაციებს ეხება. ბიუროს სხდომაზე ხორავას ქუჩაზე მკვლელობის საქმეზე შექმნილი საგამოძიებო კომისიის მიერ გაცემული რეკომენდაციების შესრულების საკითხის განხილვას ხმაური და სიტყვიერი დაპირისპირება მოჰყვა.