საპრეზიდენტო არჩევნები 2018 – „ქართული ოცნება“ არჩევნების მეორე ტურისთვის საგანგებო რეჟიმში მუშაობას განაგრძობს. მორიგი შეხვედრა „ოცნების“ ოფისში გვიანობამდე გაგრძელდა. როგორც ცნობილია პარტიის წარმომადგენლები ამჯერად „ქართული ოცნების“ ე.წ. ძველი გვარდიის წარმომადგენლებს შეხვდნენ. კონსულტაციები პარტიაში სავარაუდოდ დღესაც გაგრძელდება.

მმართველი გუნდის წარმომადგენელთა განცხადებით, ყველაფერი უნდა გაკეთდეს იმისთვის, რომ არჩევნებში არა „ნაციონალურმა მოძრაობამ“, არამედ სალომე ზურაბიშვილმა გაიმარჯვოს.

„ძველი გვარდია ფორმაშია, 2012 წლის ნაბრძოლი გუნდის დიდი ნაწილი ამ ბრძოლაში აუცილებლად მიიღებს მონაწილეობას. სახელების და გვარების წინასწარ დასახელება მე მგონი არ არის სწორი. იმიტომ, რომ ძალიან დიდი სიაა და არ მინდა ვინმე გამომრჩეს,“-განაცხადა გედევან ფოფხაძემ.