პარლამენტის შენობის წინ, შვილმოკლული მამების აქციაზე ამ დროისთვის 17 კარავია გაშლილი. არასამთავრობო ორგიანიზაციების წარმომადგენლებმა და აქციის მხარდამჭერებმა ზაზა სარალიძისა და მალხაზ მაჩალიკაშვილისადმი სოლიდარობის ნიშნად ღამე კარვებში გაატარეს.

ღამემ ექსესების გარეშე ჩაიარა. აქცია 11 ნოემბერს დღის მეორე ნახევარში განახლდება,

არასამთავრობო ორგანიზაციის წარმომადგენლების განცხადებით, კარვების აქცია ერთგვარი პერფორმანსი იყო, რითაც ხელისუფლებას შეახსენეს, რომ ეს კანონდარღვევა არ არის. არასამთავრობოების ნაწილი აღნიშნავს, რომ ამ პერფორმანსმა დაადასტურა შერჩევითი სამართლის პრაქტიკა, რითაც სამართლებრივი კუთხით საქართველოს მოქალაქეები არათანაბარ პირობებში იმყოფებიან. მათი განცხადებით, ამას ადასტურებს ის ფაქტი, რომ არასამთავრობო ორგანიზაციებს კარვის დადგმის საშუალება მისცეს, ხოლო ზაზა სარალიძეს და მალხაზ მაჩალიკაშვილს ორი თვეა ამ უფლებას უზღუდავდნენ.

10 ნოემბერს საღამოს რვა საათისთვის პარლამენტის შენობის წინ შვილმოკლული მამებისადმი სოლიდარობის აქცია "კარვებით ვიცავთ თავისუფლებას!" დაიწყო.

არასამთავრობო ორგანიზაციების წარმომადგენლები პარლამენტის წინ მივიდნენ და კარვების გაშლა სცადეს, რასაც დაპირისპირება მოჰყვა პოლიციასთან.

დაპირისპირების მიუხედავად, მას შემდეგ, რაც აქციას ზაზა სარალიძის მხარდამჭერები შეუერთდნენ, პარლამენტის წინ კარვები მაინც გაიშალა.