პარლამენტის ვეგვერდიდან წაშლილი სააკაშვილის განცხადება აგვისტოს ომზე

პარლამენტის ვეგვერდიდან წაშლილი სააკაშვილის განცხადება აგვისტოს ომზე - პარლამენტი მიზეზებზე საუბრობს

პოლიტიკა - 18:04, 10 Nov, 2018

930

რუსეთის ფედერაციის მხრიდან საქართველოს ტერიტორიული მთლიანობის ხელყოფის მიზნით განხორციელებული სამხედრო აგრესიისა და სხვა ქმედებების შემსწავლელი საქართველოს პარლამენტის დროებითი საგამოძიებო კომისიის მასალების პარლამენტის ვებგვერდიდან წაშლასთან დაკავშირებით საქართველოს პარლამენტის საზოგადოებასთან ურთიერთობისა და ინფორმაციის დეპარტამენტი განცხადებას ავრცელებს.
საუბარია პაატა დავითაიას მიერ გავრცელებულ ინფორმაციაზე, რომლის მიხედვითაც, პარლამენტის ვებგვერდიდან წაიშალა საგამოძიებო კომისიის სხდომის ის ჩანაწერი, სადაც მიხეილ სააკაშვილი აგვისტოს ომის მიზეზებზე საუბრობს და, რომელიც ზოგიერთმა მედიასაშუალებამ ფეიკ-ნიუსად გაავრცელა.

„გვსურს, გამოვეხმაუროთ ნაციონალური მოძრაობის წარმომადგენლის, 2008-2012 წლებში საქართველოს პარლამენტის წევრის, პაატა დავითაიას განცხადებას და სამაუწყებლო კომპანია „რუსთავი 2"-ის მიერ გავრცელებულ ინფორმაციას იმის შესახებ, თითქოს რუსეთის ფედერაციის მხრიდან საქართველოს ტერიტორიული მთლიანობის ხელყოფის მიზნით განხორციელებული სამხედრო აგრესიისა და სხვა ქმედებების შემსწავლელი საქართველოს პარლამენტის დროებითი საგამოძიებო კომისიის მასალა გაურკვეველ ვითარებაში წაიშალა საქართველოს პარლამენტის ოფიციალური ვებგვერდიდან.

რუსეთის ფედერაციის მხრიდან საქართველოს ტერიტორიული მთლიანობის ხელყოფის მიზნით განხორციელებული სამხედრო აგრესიისა და სხვა ქმედებების შემსწავლელმა საქართველოს პარლამენტის დროებითმა კომისიამ მუშაობა 2009 წელს დაასრულა. კომისიის მუშაობის მასალები ავტომატურად გადავიდა არქივში.

2012 წლის ივლისში გაკეთდა პარლამენტის ახალი ვებგვერდი. ძველი ვებ-გვერდიდან ტექნიკურად ვერ მოხერხდა სრული მასალის საქართველოს პარლამენტის განახლებულ ოფიციალურ ვებგვერდზე გადმოტანა.

განახლებულ ვებ-გვერდზე მხოლოდ კომისიის დასკვნა მექანიკურად, ხელით იქნა გადმოტანილი. ვებგვერდზე დაიკარგა დიდი მოცულობის ინფორმაცია 2012 წელს განხორციელებული კიბერშეტევის შედეგადაც. ამჟამად მოქმედმა ვებგვერდმა სწორედ აღნიშნული კიბერშეტევის შედეგად, 2013 წლიდან ჩაანაცვლა წინამორბედი. შესაბამისად, საგამოძიებო კომისიის მასალები არ განთავსებულა საქართველოს პარლამენტის არათუ მოქმედ, არამედ 2012 წელს შექმნილ ოფიციალურ ვებგვერდზეც.“- აღნიშნულია განცხადებაში.