"პოლიციელი ექსტრემალურ სიტუაციაში მოიქცა თავისი ღირსების და უფლებამოსილების შესაბამისად" - გახარია მძარცველის მკვლელობაში ბრალდებული პოლიციელის შესახებ

პოლიტიკა - 14:58, 10 Nov, 2018

4123

ვიცე-პრემიერი, შინაგან საქმეთა მინისტრი გიორგი გახარია სამეგრელოში, ჩხოროწყუში სახალხო დღესასწაულს დაესწრო. მან ჟურნალისტებთან კომენტარი გააკეთა ქალაქ ფოთში, რამდენიმე თვის წინ მომხდარ შემთხვევაზე და მძარცველის მკვლელობაში ბრალდებული პოლიციელის შესახებ ისაუბრა

„მოდით, შევთანხმდეთ ერთ რამეზე, რომ ჩვენს პოლიციელებზე ჩვენ უფრო ვზრუნავთ და ჩვენ უფრო მეტად შეგვტკივა გული ვიდრე თქვენ. მეორე, რა თქმა უნდა, ჩვენ ყველაფერს გავაკეთებთ იმისთვის, რომ სიმართლე იქნას დადგენილი, როგორც შინაგან საქმეთა სამინისტრო ასევე სახელმწიფო ყველა სახის ზრუნვას გაწევს. ყველა სხვა პოლიციელისთვის მაგალითი არის შემდეგი, რომ ეს არის ის ადამიანი, რომელსაც არ შეეშინდა და იმ ექსტრემალურ სიტუაციაში მოიქცა თავისი ღირსების და უფლებამოსილების შესაბამისად, ამიტომ ეს არის დასაფასებელი. გამოძიება, რომელიც ახლა მიმდინარეობს, ჩვენ დარწმუნებული ვართ, რომ ერთმნიშვნელოვნად დაადგენს სიმართლეს და როგორც კი ეს სიმართლე იქნება დადგენილი ეს ადამიანი იქნება დაფასებული სწორედ იმ ზომით რა ზომითაც ის იმსახურებს“, - განაცხადა გიორგი გახარიამ.

23 ივლისს სწრაფი ჩარიცხვის აპარატის გაქურდვის მცდელობის დროს სამართალდამცავმა მამაკაცს სავარაუდოდ, წინააღმდეგობის გაწევისას ესროლა. დამნაშავე თავის არეში დაიჭრა და ზუგდიდის საავადმყოფოში გარდაიცვალა.

7 ნოემბერს ფოთელი პოლიციელი, რომელიც მძარცველის მკვლელობაშია ბრალდებული ზუგდიდის რაიონულმა სასამართლომ პატიმრობაში დატოვა.