ჰელსინკში ნატო-ს საპარლამენტო ასამბლეის პრეზიდენტმა საქართველოს საპრეზიდენტო არჩევნებზე განცხადება გააკეთა და აღნიშნა - „ამ არჩევნებმა აჩვენა, რომ ყველაფერს ფულით ვერ იყიდი“. რასა იუკნევიჩენე საპრეზიდენტო არჩევნების პირველ ტურს აკვირდებოდა.

აღნიშნულ განცხადებას გაერთიანებული ოპოზიციის „ძალა ერთობაშიას“ საპრეზიდენტო კანდიდატი გრიგოლ ვაშაძე აფასებს. ვაშაძის თქმით, საქართველოს მოქალაქეები ყოველთვის აკეთებენ სწორ, მყარ არჩევანს და ეუბნებიან უარს ხელისუფლებებს, რომლებიც დროა რომ გაისტუმრონ.

„არ ვიცი რა დამატებითი კომენტარი სჭირდება ფრაზას, რომ "ყველაფერს ფულით ვერ იყიდი," მაგრამ ვამბობდი, ვამბობ და ვიმეორებ, რომ საქართველოს მოქალაქეს ძალიან საღი, მყარი და დემოკრატიულად გამართული პოზიცია აქვს. 2003 წელს გაისტუმრა ხელისუფლება, რომელიც კორუმპირებული ჩინოვნიკები და მათთან შეზრდილი კრიმინალებით იყო დაკომპლექტებული. 2012 წელს გაისტუმრა ხელისუფლება, რომლის შეცდომებითაც უკმაყოფილო იყო და რომელიც იყო იდეოლოგიურად მძლავრი და სრული კონტროლის მფლობელი სახელმწიფო აპარატზე და 2018 წელს გაისტუმრებს ხელისუფლებას, რომელსაც აქვს არანორმალურად ბევრი ფული და რომელიც არ ერიდება ამ ფულის საარჩევნო პროცესში გამოყენებას. წაგებული არ დარჩება არავინ. დემოკრატია არის იმის გარანტი, რომ ჩვენ ყველა ამოცანას რაც არ უნდა იყოს ეს ევროპული ინტეგრაცია, ატლანტიკური ინტეგრაცია, ეკონომიკური კეთილდღეობა, სოციალური თანასწორობა, პოლიტიკური სამართლიანობა, ყველაფერს მივაღწევთ და მივაღწევთ მხოლოდ და მხოლოდ მაშინ, როდესაც ჩვენ საზოგადოებაში იქნება სრულფასოვანი და გამართული დემოკრატია,“-განაცხადა გრიგოლ ვაშაძემ.