გაერთიანებული ოპოზიციის „ძალა ერთობაშიას“ რიგებში, სალომე ზურაბიშვილის იმ განცხადებას გამოეხმაურნენ, სადაც მმართველი გუნდის მიერ მხარდაჭერილმა ე.წ. დამოუკიდებელმა პრეზიდენტობის კანდიდატმა მავთულხლართებს საზღვარი უწოდა. საზოგადოებრივი მოძრაობის ”ახალი ერთობა საქართველოსთვის” დამფუძნებელი, ნიკა ვაშაკიძე აცხადებს, რომ ეს განცხადება, სახელისუფლებო კანდიდატის ოკუპაციისადმი დამოკიდებულებას კიდევ ერთხელ გამოხატავს.

„თითქოსდა აღარაფერი არ გვიკვირს ქალბატონი სალომეს განცხადებებთან დაკავშირებით, მან უტიფრად ამ საოკუპაციო ზოლს საზღვარი უწოდა და მთელი ეს პრობლემა იმ ჭრილში განიხილა, რომ თითქოს ეს საკითხი დახურულია და ახლა მთავარი ამოცანაა, რაც მართლა არის ამოცანა, მაგრამ, ეს არის ერთ-ერთი მხოლოდ მთავარი ამოცანა ამ საზღვართან, როგორც მან თქვა, მცხოვრები მოსახლეობის უფლებები იქნას დაცული. ეს მჭიდრო ურთიერთკავშირში იმყოფება სწორედ მის მიერ თავის დროზე გაჟღერებულ „კონცეფციასთან“ იმასთან დაკავშირებით, რომ ოკუპირებული ტერიტორიები წარმოადგენს განგრენას საქართველოს სახელმწიფოსთვის და ის ჩამოსაშორებელია,“ - განაცხადა ნიკოლოზ ვაშაკიძემ.