საპრეზიდენტო არჩევნები 2018 – „ქართული ოცნება“ მუშაობის საგანგებო რეჟმზეა გადასული, თუმცა, მისი მხარდაჭერილი კანდიდატი სალომე ზურაბიშვილი კამერებისა და საზოგადოების წინ ერთი კვირაა არ გამოჩენილა.

არსებული ინფორმაციით, „ქართული ოცნების“ ხელმძღვანელობა შეთანხმდა იმაზე, რომ მეორე ტურამდე სალომე ზურაბიშვილი რაც შეიძლება იშვიათად უნდა გამოჩნდეს:

„სალომე ზურაბიშვილი დაიწყებს, რასაკვირველია, შეხვედრებს, ჩამოყალიბდება. იგი ახლა ჩვენთან ერთად კონსულტაციებს გადის საარჩევნო სისტემაში ჩართულ საკვანძო ფიგურებთან და აქტივისტებთან. თუ სადმე ცვლილებები იქნება საჭირო - შეიცვლება. ირაკლი ღარიბაშვილი და ბევრი სხვა იქნება იმ ჯარისკაცად, როგორც ყოველთვის მოიაზრებოდა „ქართულ ოცნებაში.“ ყველანაირი საუბარი, რომ მამუკა ბახტაძე, ვინმე სხვა პარტიული ლიდერები იქნებიან დათხოვნილნი და გადაყენებულნი, არის ერთადერთი მიზნით წამოწყებული, რომ რაღაცა დისონანსი შემოიტანოს. მე არ მესმის, რა არა ვთქვი სწორად და გაუგებრად,“- განაცხადა გია ვოლსკიმ.

მმართველ გუნდში ამბობენ, რომ საპრეზიდენტო არჩევნების მეორე ტურისთვის მზადება და მუშაობა აქტიურად მიმდინარეობს.

„საარჩევნო კამპანია მიმდინარეობს და საარჩევნო კამპანიაში, რა თქმა უნდა, "ოცნების" მხარდაჭერილი კანდიდატის, სალომე ზურაბიშვილის კამპანიაც გრძელდება. კონსულტაციები რად უნდა ამას. ეს არ არის კონსულტაცია, ეს არის მუშაობა,“- განაცხადა გია ჟორჟოლიანმა.