ოპოზიციის შეფასებით, ატოცში მავთულხლართების დამონტაჟების განახლების მიზეზი საქართველოს ხელისუფლების რუსეთთან არათანამიმდევრული პოლიტიკის შედეგია

პოლიტიკა - 10:29, 07 Nov, 2018

761

რუსეთის მხრიდან საქართველოში მცოცავი ოკუპაცია გრძელდება - ქარელის მუნიციპალიტეტის სოფელ ატოცთან ერთი კილომეტრის სიგრძის მონაკვეთზე საოკუპაციო ხაზის ხელოვნური ბარიერებით გამაგრება მიმდინარეობს.
უკანონო ბორდერიზაციის შესახებ საკიანონმდებლო ორგანოში დილიდან განცხადებები კეთდება.

ოპოზიციაში მიიჩნევენ, რომ მავთულხლართების დამონტაჟების განახლების მიზეზი საქართველოს ხელისუფლების რუსეთთან არათანამიმდევრული პოლიტიკის შედეგია, რასაც სალომე ზურაბიშვილის კანდიდატურაც ხელს უწყობს.

„მავრთულხლართების გაბმა ეს არის პირდაპირი მუქარა საქართველოს მისამართით და გაფრთხილება ჩვენი ქვეყნის მოსახლეობის, რომ თუკი არჩეული იქნება ისეთი კანდიდატი, რომელიც არ არის პრორუსულად განწყობილი საქართველოს შეექმნება პრობლემები“-ამბობს რომან გოცირიძე.

„ევროპულ საქართველოში“ კი აცხადებენ რომ არცერთ ეტაპზე, საქართველოს ხელისუფლება საერთაშორისო ასპარეზზე რუსეთის წინააღმდეგ არსებულ მტკიცებულებებს არ იყენებს.

„სამწუხაროა, რომ არცერთ ეტაპზე მათ შორის იმ დროს როცა საქართველოს ხელისუფლებას ხელში ეჭირა მტკიცებულებები, როგორ არღვევენ შეთანხმებას ადამიანის უფლებებს რუსეთის საოკუპაციო ძალები ეს მტკიცებულებები არ გამოიყენეს საკმარისად საერთაშორისო ასპარეზზე. ამ ყველაფრის გაგრძელებაა, რასაც საოკუპაციო ზოლზე ბედავენ რუსი ოკუპანტები,“-ამბობს ირაკლი კიკნაველიძე.

მმართველ გუნდში აცხადებენ, რომ ხელისუფლება ყველაფერს აკეთებს, რათა საერთშორისო საზოგადოებამ მომხდარს შესაბამისი შეფასება მისცეს.

„არის ცალსახად პროვოკაციული ქმედება რომლის მომსწრენიც პერიოდულად ვხდებით, ეს არის ხალხის მშვიდობიანი მოსახლეობის მიმართ მიმართული ქმედება და არის დაუშვებელი. ჩვენ ვართ მოწოდებული იმისთვის, რომ რაც შეიძლება მეტი ჩართულობა გვქონდეს მეტი შესაძლებლობები გავხადოთ ხელმისაწვდომები ჩვენი საზოგადოებისთვის მათ შორის საოკუპაციო ხაზს მიღმა,“-ამბობს პარლამენტის ევროპასთან ინტეგრაციის კომიტეტის თავმჯდომარე თამარ ხულორდავა.