„იყო მთელი რიგი ხარვეზები ამ წლების მანძილზე ხელისუფლების საქმიანობაში, ამის გარეშე არ არსებობს არც ერთი ხელისუფლების საქმიანობა, თუმცა, ჩვენთვის მთავარია, რომ ვიმუშაოთ მაქსიმალურად იმისთვის, რომ განვავითაროთ ჩვენი ქვეყანა და ვიმოქმედოთ იმის მიხედვით, თუ რა არის ჩვენი საზოგადოების მთავარი საწუხარი და პრიორიტეტი - ეს იყო გაჟღერებული ბატონი ბიძინა ივანიშვილის დღევანდელ გზავნილში”,- ამის შესახებ ჟურნალისტებს საქართველოს პარლამენტის თავმჯდომარემ განუცხადა.

ირაკლი კობახიძის თქმით, მმართველი გუნდისთვის უმთავრესი პრიორიტეტი საზოგადოების დაკვეთის შესაბამისად მოქმედებაა.

მისივე თქმით, კიდევ ერთი მნიშვნელოვანი გზავნილი საკადრო პოლიტიკას ეხებოდა. ირაკლი კობახიძის განცხადებით, ამ მიმართულებით, ბევრი რამ არის დასახვეწი.

“ეს არის ძალიან მნიშვნელოვანი სხვადასხვა დონეზე, სხვადასხვა მიმართულებით. დაწყებული ცენტრალური ხელისუფლებით, დამთავრებული ადგილობრივი თვითმმართველობით. ჩვენ განსაკუთრებული ყურადღება უნდა დავუთმოთ საკადრო პოლიტიკას და სწორედ ამას ეხებოდა, რა თქმა უნდა, დღევანდელი კიდევ ერთი ძალიან მნიშვნელოვანი გზავნილი. რა თქმა უნდა, სწორი პოლიტიკა ვერ განხორცილდება სწორი კადრების გარეშე და აქედან გამომდინარე, ყოველდღიური მუშაობის საგანი უნდა იყოს საკადრო პოლიტიკის დახვეწა ხელისუფლებაში”,- აღნიშნა საქართველოს პარლამენტის თავმჯდომარემ და აღნიშნა, რომ მთავარია, საკადრო პოლიტიკა ობიექტურ კრიტერიუმებზე იყოს აგებული.

„ჩვენთვის მთავარია, რომ საკადრო პოლიტიკა აგებული იყოს ობიექტურ კრიტერიუმებზე და რა თქმა უნდა, მთავარი და წამყვანი არის კვალიფიკაცია, გამოცდილება და ის წვლილი, რომელიც ამა თუ იმ ადამიანს აქვს შეტანილი კონკრეტულ წარმატებაში. ეს არის მთავარი კრიტერიუმები და ამის საფუძველზე განხორციელდება, რა თქმა უნდა, საკადრო პოლიტიკა“,- განაცხადა ირაკლი კობახიძემ.

საქართველოს პარლამენტის თავმჯდომარის თქმით, მთავარი საკადრო განახლებაა და საუბარია იმაზეც, რომ პოლიტიკაში ახალი სახეებიც უნდა გამოჩნდნენ. მან ხაზგასმით აღნიშნა, რომ მმართველი გუნდისთვის საარჩევნო სიის მუდმივი განახლება პრიორიტეტია.

„რა თქმა უნდა, ამ ყველაფერს დრამატულად არ უნდა შევხედოთ, ჩვენთვის მთავარი არის საკადრო განახლება. აქ საუბარია იმაზეც, რომ ახალი სახეებიც უნდა გაჩნდეს პოლიტიკაში და რა თქმა უნდა, როდესაც, 2020 წლისთვის საპარლამენტო სია შედგება იქ ძალიან ბევრი ახალი სახე უნდა იყოს წარმოდგენილი და ეს ყველაფერი ობიექტურ კრიტერიუმებზე უნდა იყოს დაფუძნებული, რაც არის კვალიფიკაცია, გამოცდილება, წვლილი პოლიტიკურ წარმატებაში. ამის საფუძველზე უნდა გადახალისდეს მათ შორის საარჩევნო სია. საარჩევნო სიის მუდმივი განახლება არის ჩვენი პოლიტიკური ძალისთვის პრიორიტეტი“,- განაცხადა პარლამენტის თავმჯდომარემ.