"ნაციონალური მოძრაობის" წევრი რომან გოცირიძე კანაფის კულტივაციის საკითხზე კანონპროექტის გაწვევასთან დაკავშირებით პარლამენტის თავმჯდომარეს მიმართავს: "როგორ იცავდით ამ კანონს და დიდ მილიარდებს რომ ჰპირდებოდით ხალხს, ეს უკვე გავიარეთ და არ გაგახსენებთ წარსულს, თქვენსავით წარსულზე არ ვილაპარაკებ, თუმცა ეს წარსული იყო 2 თვის წინ.

თქვენ არ გაითვალისწინეთ არც პარტიების, არც საზოგადოების, არც არასამთავრობო ორგანიზაციების მოთხოვნა. როგორც იქნა მაინც ისევ ამ არჩევნებში, პირველ ტურში გაერთანებულ ოპოზიციასთან დამარცხების შემდეგ შეშინდით და გაიწვიეთ ეს კანონი. ამავე დროს გარკვეული როლი ითამაშა ეკლესიამაც. ახლა გეკითხებით, ეს არის ფანდი, დროებით გაგაქვთ კანონი, თუ ამ 500%-იანი მოგებით თვალანთებული ადამიანის სურვილები საბოლოოდ იქნება ჩამცხრალი?! იმიტომ, რომ 500% -იანი მოგება ეს ძალიან ოხერი რაღაცაა და დიდი მაცდუნებელი რამ არის. თუ თქვენ ამ კანონის უკან დაბრუნებას არ აპირებთ, და ეს ეკლესიასთან შეხვედრის შემდეგ მოხდა, ბატონო ირაკლი ბიბლიაზე დაიფიცეთ, რომ ამ კანონს უკან არ შემოაბრუნებთ, მაშინ დაგიჯერებთ”, – განაცხადა რომან გოცირიძემ.