"ეს მიმართვა მეტ-ნაკლებად რეალობის ადეკვატური იყო, ბიძინა ივანიშვილმა ფაქტობრივად აღიარა შეცდომების დიდი ნაწილი და ეს კარგია. სხვა საკითხია, ის რომ ეს უკან მიდევნებული მიმართვაა და შესაბამისად, მას დამაჯერებლობა დაკარგული აქვს. ამ ტიპის მიმართვა მას 28 ოქტომბრამდე, რომ გაეკეთებინა, მას ეფექტი ექნებოდა, დღეს კი ამ მიმართვას განუზომლად ნაკლები ძალა აქვს.

ნიშნის მოგებით ნამდვილად არ ვამბობ, მაგრამ როდესაც ვამბობდი, რომ ივანიშვილმა ლიდერის ალღო დაკარგა, რასაც მისი მხრიდან ჩემი მისამართით აგრესია მოჰყვა, ზუსტად ამას ვგულისხმობდი. ლიდერს შეუძლია პრობლემების წინასწარ განჭვრეტა და პრევენციული მოქმედებების უნარი აქვს. დღევანდელი მისი განცხადება უფრო უკან მიდევნებულს ჰგავს, ვიდრე პრევენცულს, რაც პრობლემაა. ჩემი აზრით, ეს მიმართვა არჩევნების შედეგებზე დიდ გავლენას ვერ მოახდენს"- აღნიშნა გია ხუხაშვილმა.

ექსპერტი ივანიშვილის გააქტიურებას ძალაუფლების დაკარგვის შიშს უკავშირებს.

​"გასაკვირი არ არის, რომ მას გარკვეული შიშები ჰქონდეს, ყველანი ადამიანები ვართ. ივანიშვილი მიხვდა, რომ პრობლემა არის სერიოზული და ის ფონი, რაც მის ინტერვიუებს გასდევდა, მოქალაქეები კიდევ უფრო გააბრაზა. ახლა ის ცდილობს რომ ტონი შეცვალოს"- დასძინა ხუხაშვილმა.

პოლიტოლოგი ამავე კონტექსტში ამბობს, რომ ხელისუფლებისთვის მიხეილ სააკაშვილი კვლავ თავის ტკივილად რჩება.

"სხვების შიშებზე კომენტარს ვერ გავაკეთებ, ყველამ თავის შიშებს მიხედოს. სამწუხაროდ, ჩვენ ხელისუფლებაში გვყავს ადამიანები, რომლებსაც მაშინაც ეშინოდათ მიშასი და ახლაც ეშინიათ. პირადად მე თუ მკითხავთ, ამ შიშის საფუძველი არც მაშინ გქონდათ და არც ახლა. კი ბატონო, სააკაშვილი პრობლემაა ხელისუფლებისთვის, თუმცა მიზეზები საკუთარ თავში უნდა ეძებონ. მათი პირდაპირი დამსახურებაა მიშა სააკაშვილის რეაბილიტირება"- განმარტა გია ხუხაშვილმა.