"სუს-მა გადაწყვეტილება მიიღო"- ლაშა გოგიასა და გია გულორდავას შემდეგ შესაძლოა, სამეგრელოს ყოფილი გუბერნატორიც დააკავონ

პოლიტიკა - 10:00, 03 Nov, 2018

1918

სამეგრელოს ყოფილი გუბერნატორი. ლევან შონია შესაძლებელია გისოსებს მიღმა აღმონდეს. ”კურიერის” ინფორმაციით, სუს-ის ანტიკორუფციულ სამსახურს სამეგრელოს ყოფილი გუბერნატორის დაკავების გადაწყვეტილება აქვს მიღებული.

გავრცელებული ცნობით, ლევან შონიას წინააღმდეგ ჩვენების მოპოვებას სახელმწიფო უსაფრთხოების სამსახური ზუგდიდის ყოფილი მერისგან ცდილობს. ლაშა გოგიასა და გია გულორდავას ხმაურიანი დაკავების შემდეგ საგამოძიებო უწყება კორუფციულ გარიგებასთან ყოფილი გუბერნატორის კავშირებითაც დაინტერესდა.

ლევან შონიას დაკავების მიზეზი შესაძლოა ”კურიერის” მიერ გასაჯაროებული აუდიოჩანაწერი გახდეს. ირკვევა, რომ ქრთამს ბიზნესმენი ზურაბ კვირკვია არა მხოლოდ ზუგდიდის მერს და მის მოადგილეს, არამედ მაშინდელ გუბერნატორს ლევან შონიასაც აძლევდა.

თანამდებობიდან გადაყენებული ყოფილი გუბერნატორი ადასტურებს, რომ სუს-ის ანტიკორუფციულ სამსახურში გამოკითხვაზე იმყოფებოდა. შონია გამოძიებას ენდობა და დაკავებას არ ელოდება.

”კურიერის” ინფორმაციით, ყოფილი გუბერნატორი მმართველ გუნდზე გაბრაზებულია და მან არც წინასაარჩევნო კამპანიაში მიიღო მონაწილეობა.

ყოფილი გუბერნატორის დაკავებას არ გამორიცხავს კახა მიქაია, რომელმაც სკანდალური ჩანაწერი რამდენიმე თვის წინ გაასაჯაროა.”ქართული ოცნების” ყოფილი აქტიური მხარდამჭერი დარწმუნებულია, რომ სამეგრელოში არჩვენების წაგებას ბიძინა ივანიშვილი ყოფილ მაღალჩინოსნებს არ აპატიებს და მათი სამაგალითოდ დასჯის დავალება საგამოძიებო უწყებას უკვე მიღებული აქვს.

ყოფილი გუბერნატორის მიმართ საგამოძიებო უწყებას კითხვები ოკუპირებული აფხაზეთიდან სამეგრელოში კონტრაბანდული საქონლის შემოტანის საქმეზეც აქვს. „ნაციონალური მოძრაობა“ დარწმუნებულია, რომ რეგიონში კონტრაბანდის შემოტანას სწორედ ლევან შონია მფარველობდა.

ლევან შონიას ახლო გარემოცვის წევრები - ზუგდიდის ყოფილი მერი და მისი მოადგილე უკვე 24 საათზე მეტია წინასწარი მოთავსების იზოლატორში იმყოფებიან. გამოძიება მათ დიდი ოდენობით ქრთამის აღებას ედავება. საქმის მასალების მიხედვით, ლაშა გოგიამ და გია გულორდავამ კონკრეტული ობიექტების აუქციონზე გატანის სანაცვლოდ, ბიზნესმენ ზურაბ კვირკვიას 21 ათას 5000 დოლარი გამოართვეს და თანხა მიითვისეს. ადვოკატების ინფორმაციით, დაკავებული მაღალჩინოსნები ბრალს არ ეთანხმებიან და თავს უდანაშაულოდ მიიჩნევენ.

ზუგდიდის ყოფილი ვიცე-მერისგან განსხვავებით, რომელიც დაკავებულია, გამოძიებას სრულ ნდობას უცხადებს მისი შვილი. წალენჯიხის მაჟორიტარი დეპუტატი დარწმუნებულია, რომ საკუთარი მამა კანონის სრული დაცვით დააკავეს.

ყოფილ მაღალჩინოსნებს გამოძიება დიდი ოდენობით ქრთამის აღებას სექტემბრიდან ედავება, თუმცა მათი დაკავება საგამოძიებო უწყება მხოლოდ არჩევნების წაგების შემდეგ გადაწყვიტა.