საქართველოს პარლამენტის თავმჯდომარე ირაკლი კობახიძე ადასტურებს, რომ კანაფის კულტივაცია-ექსპორტის კანონპროექტის პარლამენტიდან გაწვევა წინასაარჩევნო პერიოდს უკავშირდება. ეს განცხადება ირაკლი კობახიძემ პატრიარქთან შეხვედრის შემდეგ გააკეთა და დასძინა, რომ ბოლო ორი დღის განმავლობაში გუნდმა საკითხზე იმსჯელა და შეთანხმდა, რომ კანონპროექტს გაიწვევდა.

„მთავარი საკითხი იყო კანონპროექტი, რომელიც ეხება კანაფის კულტივაციას. ამასთან დაკავშირებით ჩვენ გვქონდა მსჯელობა გუნდში, გვქონდა მსჯელობა ასევე უმრავლესობის შეხვედრაზე, რომელსაც ესწრებოდა პრეზიდენტობის კანდიდატი ქალბატონი სალომე ზურაბიშვილი და ჩვენ მივიღეთ გადაწყვეტილება, რომ მოხდება კანონპროექტის გაწვევა.

როგორც მოგეხსენებათ იყო განსხვავებული მოსაზრებები გუნდის შიგნით. ჩვენ იმთავითვე განვაცხადეთ, რომ ნებისმიერი გადაწყვეტილება, ამ კანონპროექტთან დაკავშირებით მიღებული იქნებოდა ფართო კონსენსუსის საფუძველზე, იქნებოდა გადაწყვეტილება მიღებული ეკლესიასთან შეთანხმებით, საზოგადოების ფართო კონსენსუსით, ეს პირობა ჩვენ შევასრულეთ.

საუბარი იყო ვადებზე, თუმცა გუშინ, განსაკუთრებით ქალბატონმა სალომე ზურაბიშვილმა დააფიქსირა პრინციპული პოზიცია იმასთან დაკავშირებით, რომ საზოგადოების განწყობებიდან გამომდინარე არ იყო მიზანშეწონილი ამ გადაწყვეტილების მიღების გადავადება.

არჩევნებსაც უკავშირდება - ესეც შემიძლია გითხრათ. კერძოდ, გუშინ როდესაც საუბრობდა ქალბატონი სალომე მის პოზიციასთან დაკავშირებით მათ შორის მან თავის პოზიცია დაასაბუთა იმ შეხვედრებით, რომელსაც ის ატარებდა რეგიონებში თუ ქალაქებში საარჩევნო პროცესში.

რა თქმა უნდა ჩვენ ამ არჩევნებმაც გვაჩვენა ის განწყობა, რომელიც არის ჩამოყალიბებული საზოგადოებაში და რა თქმა უნდა ესეც გახდა გადაწყვეტილების მიღების მიზეზი,“- განაცხადა ირაკლი კობახიძემ პატრიარქთნ შეხევდრის შემდეგ.