მსოფლიო ჩემპიონი ძიუდოისტების პროტესტის მიუხედავად, ფედერაციის პრეზიდენტი გიორგი ათაბეგაშვილი გახდა

სპორტი - 13:43, 24 Oct, 2018

8688

სასტუმრო ბილტმორში გამართულ ძიუდოს ფედერაციის რიგგარეშე ყრილობაზე ფედერაციის პრეზიდენტის არჩევნები ჩატარდა. ყრილობაზე 46 დელეგატიდან 41 გამოცხადდა და მათგან 400-მა მხარი გიორგი ათაბეგაშვილს დაუჭირა.

გიორგი ათაბეგაშვილი, რომელიც ძიუდოს ფედერაციის გენერალური მდივანია, ერთადერთი კანდიდატი იყო. ძიუდოს ფედერაციის არჩევნების დაწყებამდე რამდენიმე წუთით ადრე კანდიდატურა ფედერაციის ყოფილმა პრეზიდენტმა დავით ქევხიშვილმა მოხსნა.

კანდიდატურები ასევე მოხსნეს დავით ხახალეიშვილმა, დავით ხახუტაშვილმა და გიორგი ალექსიძემ.

ძიუდოში მსოფლიო ჩემპიონები ფედერაციის პრეზიდენტის არჩევნებს ბოიკოტი გამოუცხადეს. საგანგებო განცხადება სპორტსმენებმა ცოტა ხნის წინ გააკეთეს. მათი განცხადებით, არჩევნებში კვლავ დავით ქევხიშვილი და მისი თანამოაზრე გიორგი ათაბეგაშვილი მონაწილეობენ და ეს სპორტსმენების პროტესტს იწვევს.

სპორტსმენების განცხადებით, არც ქევხიშვილი და არც ათაბეგიშვილი სპორტსმენებს არ შეხვედრიან და მათი გეგმების შესახებ არ უსაუბრიათ, ამიტომ დღეს დაგეგმილი კენჭისყრა არალეგიტიმურია. მათივე თქმით, ჰქონდათ ინფორმაცია, რომ არჩევნები უნდა გადადებულიყო, თუმცა გუშინ საღამოს მოულოდნელად გაიგეს, რომ კენჭისყრა დღეს არის დაგეგმილი.

თუ არჩევნები არ გადაიდება და სპორტსმენებისთვის არასასურველი პირი გახდება ძიუდოს ფედერაციის პრეზიდენტი, სპორტსმენები პროტესტის ახალ ტალღას აანონსებენ. აცხადებენ, რომ წინა კრიზისის შემდეგ ფედერაციაში არაფერი შეცვლილა და ქევხიშვილის ან მისი თანამოაზრის პრეზიდენტად დაბრუნების შემთხვევაში, ვითარება გამწვავდება.