"მე ვარ ის ერთი შენი გულშემატკივარი და ნება იბოძე გამოცხადდი ნაკრების ყველა მატჩზე!"- “ჩიხურას” დირექტორის მიმართვა გურამ კაშიას

სპორტი - 14:58, 29 Aug, 2018

7116

საქართველოს ნაკრების ვიცე-კაპიტნის გურამ კაშიას განცხადებას იმასთან დაკავშირებით, რომ გარკვეული ჯგუფის მიერ მის მიმართ გამოვლენილი აგრესიის მიუხედავად, სანამ ერთი ადამიანი მაინც ეყოლება საქართველოში გულშემატკივარი, იმ ადამიანისთვის გამოცხადდება ნაკრებში, საფეხბურთო გუნდის საჩხერეს “ჩიხურას” დირექტორი, ბერიკა შუკაკიძე ფეისბუკზე ეხმაურება:

„მეგობარო გურამ კაშია, მე ვარ ის ერთი შენი გულშემატკივარი და ნება იბოძე გამოცხადდი ნაკრების ყველა მატჩზე!“- წერს ბერიკა შუკაკიძე.

გურამ კაშიას წინააღმდეგ აგრესიის მორიგი ტალღა მას შემდეგ აგორდა, რაც ცნობილი გახდა, რომ საქართველოს ნაკრების ლიდერი უეფა-ს გადაწყვეტილებით, Equal Game-ის ჯილდოს პირველი მფლობელი გახდა. აღნიშნული ჯილდო იმ მოთამაშეს გადაეცემა, რომელიც სამაგალითოდ მოიქცა ევროპულ ფეხბურთში ინკლუზიურობის, მრავალფეროვნებისა და ხელმისაწვდომობის პოპულარიზაციის კუთხით. ჯილდო გურამ კაშიას 30 აგვისტოს, მონაკოში უეფას ჩემპიონთა ლიგის ჯგუფური ეტაპის წილისყრისას გადაეცემა.

შეგახსენებთ, საქართველოს ნაკრების გამორჩეული ფეხბურთელი და იმ დროისთვის არნემის ვიტესის კაპიტანი გურამ კაშია 2017 წლის ოქტომბერში ჩატარებულ მორიგ მატჩზე ლგბტ დროშის სამკლაურით წარსდგა. ამ ნაბიჯით ის შეუერთდა Stonewall-ის თანასწორობის კამპანიას, რომელიც ლგბტ ადამიანების უფლებების დაცვას ეძღვნება. აღნიშნულ ფაქტს დიდი გამოხმაურება მოჰყვა საქართველოში, ჰომოფობიურად განწყობილმა ჯგუფებმა, გურამ კაშიას ნაკრებიდან გარიცხვა მოითხოვეს და ამ მიზნით რამდენიმე საპროტესტო აქცია ჩაატარეს.