გურამ კაშიამ ფეისბუკი შეურაცხმყოფელი შეტყობინებების გამო გააუქმა - აგრესიის და მხარდამჭერის კამპანია ნაკრების ვიცე-კაპიტნის მიმართ

სპორტი - 10:17, 29 Aug, 2018

4367

საქართველოს ეროვნული ნაკრების ვიცე-კაპიტანმა გურამ კაშიამ ფეისბუკის ოფიციალური გვერდი შეურაცხმყოფელი შეტყობინებების გამო გააუქმა. ამის შესახებ ინფორმაცია მან ინსტაგრამზე გაავრცელა. თავად ინსტაგრამის საჯარო ანგარიშიც მხოლოდ გამომწერებისთვის დატოვა ხელმისაწვდომი.

როგორც გურამ კაშია ინსტაგრამ სთორიში წერს, ის არაფერს ნანობს და სანამ ერთი ადამიანი მაინც ეყოლება საქართველოში გულშემატკივარი, იმ ადამიანისთვის გამოცხადდება ნაკრებში.

გურამ კაშიას წინააღმდეგ აგრესიის მორიგი ტალღა მას შემდეგ აგორდა, რაც ცნობილი გახდა, რომ საქართველოს ნაკრების ლიდერი უეფა-ს გადაწყვეტილებით, Equal Game-ის ჯილდოს პირველი მფლობელი გახდა. აღნიშნული ჯილდო იმ მოთამაშეს გადაეცემა, რომელიც სამაგალითოდ მოიქცა ევროპულ ფეხბურთში ინკლუზიურობის, მრავალფეროვნებისა და ხელმისაწვდომობის პოპულარიზაციის კუთხით. ჯილდო გურამ კაშიას 30 აგვისტოს, მონაკოში უეფას ჩემპიონთა ლიგის ჯგუფური ეტაპის წილისყრისას გადაეცემა.

ჯილდოს მიღებას გურამ კაშია ვიდეომიმართვით გამოეხმაურა, უეფას მადლობა გადაუხადა და განაცხადა, რომ ადამიანების თანასწორობის მომხრე იქნება როგორც მინდორზე ასევე მინდვრის მიღმაც.

კაშიას მიმართ აგრესიის კამპანიის პარალელურად #გურამშენთანვართ – ამ ჰეშთეგით სოციალურ ქსელებში გურამ კაშიას მხარდამჭერი კამპანიაც დაიწყო. ეროვნული ნაკრების ვიცეკაპიტნის მხარდამჭერები ინსტაგრამის სთორიში გურამ კაშიას ფოტოს აქვეყნებენ ჰეშთეგით #გურამშენთანვართ და ნიშნავენ თავად გურამ კაშიასაც @37gk.

შეგახსენებთ, საქართველოს ნაკრების გამორჩეული ფეხბურთელი და იმ დროისთვის არნემის ვიტესის კაპიტანი გურამ კაშია 2017 წლის ოქტომბერში ჩატარებულ მორიგ მატჩზე ლგბტ დროშის სამკლაურით წარსდგა. ამ ნაბიჯით ის შეუერთდა Stonewall-ის თანასწორობის კამპანიას, რომელიც ლგბტ ადამიანების უფლებების დაცვას ეძღვნება. აღნიშნულ ფაქტს დიდი გამოხმაურება მოჰყვა საქართველოში, ჰომოფობიურად განწყობილმა ჯგუფებმა, გურამ კაშიას ნაკრებიდან გარიცხვა მოითხოვეს და ამ მიზნით რამდენიმე საპროტესტო აქცია ჩაატარეს.

გურამ კაშიას მხარდაჭერა გამოუცხადა საქართველოს პრეზიდენტმა გიორგი მარგველაშვილმა, ფეხბურთის ფედერაციის პრეზიდენტმა ლევან კობიაშვილმა, დედაქალაქის მერმა, ყოფილმა ფეხბურთელმა კახა კალაძემ და საზოგადოების დიდმა ნაწილმა.