ესპანეთში დაკავებული სამი "კანონიერი ქურდი" კრიმინალური კლანის იმ წევრებს წარმოადგენდნენ, რომელსაც მერაბ ჯანგველაძე და ტარიელ ონიანი ხელმძღვანელობენ.
გამოცემა "პრაიმ-კრაიმის" ინფორმაციით, დაკავებულთაგან ერთ-ერთი სომხეთის მოქალაქე არტემ სარგსიანი გახლავთ, ორი კი წარმოშობით ქართველი "კანონიერი ქურდია", მათ შორის ირაკლი ფიფია, იგივე "იკა სუხმსკი", რომელიც მერაბ ჯანგველაძის უახლოესი გარემოცვის წევრად მიიჩნევა. ჯანგველაძე-ონიანის კლანის გავლენიანი წევრია მესამე დაკავებული, ასევე სოხუმელი "კანონიერი ქურდი" ლაშა ბარათელიც, მეტსახელად "ჭია". მას ასევე, მჭიდრო კავშირი ჰქონდა 2016 წელს სტამბულში მოკლულ როვშან ჯანიევთან. სწორედ ამ უკანასკნელმა „აკურთხა“ ქურდად 2014 წელს ლაშა ბარათელი. ამ კლანის სახელს უკავშირდება „დედ ჰასანის“ მკვლელობა, რის გამოც ლაშა ბარათელზე შურისძიება არაერთხელ სცადეს, ისევე როგორც ამავე კლანის სხვა „კანონიერ ქურდებზე“. მაგალითად, 2014 წელსვე ლაშა ბარათელს „დედ ჰასანის“ დაჯგუფების წევრები სასტიკად გაუსწორდნენ და მას სხეულზე მრავლობითი ჭრილობებიც მიაყენეს. მაშინ „ჭია“ სიკვდილს სასწაულებრივად გადაურჩა. 2016 წლის ზაფხულში ბარათელი რუსეთში დააკავეს და საქართველოში გამოადეპორტეს, თუმცა თბილისის საერთაშორისო აეროპორტში ჩამოსულ „კანონიერ ქურდს“ სამართალდამცველები არ დახვედრიან. ის მხოლოდ მომდევნო დღეებში ლარსის სასაზღვრო გამშვებ პუნქტთან დააკავეს, საიდანაც კვლავ რუსეთში დაბრუნებას ცდილობდა. გამომდინარე იქიდან, რომ მას საქართველოს ტერიტორიაზე ქმედითი დანაშაულის ჩადენა ვერ დაუმტკიცეს და ამასთანავე, ბარათელი ოფიციალურად საქართველოს მოქალაქე არ გახლავთ, სამართალდამცველებს მისი გათავისუფლება მოუწიათ. „კანონიერ ქურდს“ ქვეყნის ტერიტორიის დატოვება მოსთხოვეს.
სამივე "კანონიერი ქურდი" ქალაქ მარბელში მდებარე რესტორანში დააკავეს, სადაც ისინი მათთან დაპირისპირებული კლანის წარმომადგენლის მკვლელობას გეგმავდნენ. სავარაუდოდ, საუბარია "დედ ხასანის" კლანის წარმომადგენელზე.
წყარო: PrimeTime.Ge.
მასალის გამოყენების პირობები