მე-17 საუკუნის ისტორიული ძეგლი, სვანეთში ყველაზე მაღალი, 29-მეტრი სიმაღლის თავადი დადეშქელიანების საგვარეულო კოშკი საფრთხეშია. რამდენიმე წლის წინ კოშკი მხოლოდ გარედან გაამაგრეს და გადახურეს. თუმცა, სარესტავრაციო სამუშაოები არ დაწყებულა. კოშკში შესვლა სახიფათოა, დანგრეულია საფეხურები, მორღვეულია გალავანი, რესტავრაცია არ ჩატარებულა საცხოვრებელი კომპლექსის სხვა ნაწილებშიც.

მესტიის რაიონის სოფელი ეცერის მოსახლეობა წლებია ამ ისტორიული ძეგლის რესტავრაციას ითხოვს.

ეცერელებმა კომპლექსის აღდგენის მოთხოვნით ადგილობრივ ხელისუფლებას რამდენჯერმე მიმართეს. თუმცა, უშედეგოდ. გამგებელი ამბობს, რომ უსახსრობის გამო ძეგლის რესტავრაცია ვერ ხდება.

რესტავრაციის გარეშე დარჩენილი ისტორიული ძეგლის გარდა, ეცერელებს სხვა, საყოფაცხოვრებო პრობლემებიც აწუხებთ. სოფელში არ აქვთ სასმელი წყალი და დასალევ წყალს, ყოველდღიურად, მეზობელი სოფლიდან ეზიდებიან.

მიუხედავად იმისა, რომ ამ სოფელში ყოველწლიურად ასობით ტურისტი ჩადის, სოფელში არ არსებობს საზოგადოებრივი ტუალეტები.

სოფელ ეცერში საბავშვო ბაღის მშენებლობა დეკემბერში უნდა დასრულებულიყო, თუმცა, ბავშვები ბაღის ახალ შენობაში სავარაუდოდ ვერც სექტემბერში მივლენ. სამუშაოები შეჩერებულია.

ეცერელები ამბობენ, რომ პრობლემების მოგვარებას წინასაარჩევნოდ ყოველთვის ჰპირდებიან და მუნიციპალიტეტი ამ პერიოდში სამუშაოებსაც იწყებს, თუმცა, გამარჯვების შემდეგ უსახსრობის მიზეზით, ისევ აჩერებს.