ანგარიშსწორება დანებით, გადატეხილი ბოთლებით და ბეისბოლის ჯოხებით - რა მოხდა აუზზე, სადაც 21 წლის სტუდენტი დაჭრეს (ახალი დეტალები)

კრიმინალი - 09:49, 05 Jul, 2018

6873

თბილისის შემოგარენში მდებარე ერთ-ერთ საცურაო აუზზე დაჭრილი 21 წლის ილია უგრეხელიძე ამ დრომდე რეანიმაციულ განყოფილებაში რჩება. სტუდენტს წინა კვირას საცურაო აუზ "შტაბში" 10 - მდე ახალგაზრდა დაესხა თავს და სასტიკად გაუსწორდა.

უგრეხელიძეები გამოძიების მიმდინარეობით უკმაყოფილოები არიან, რადგან მათი თქმით, უწყებას სავარაუდო დამნაშავეები უკვე იდენტიფიცირებულები ჰყავს, თუმცა მათი დაკავება ამ დრომდე არ მომხდარა.

"კისერზე სამჯერ აქვს დასმული, მუცლის არეში აქვს გადამტვრეული ბოთლით, მიყენებული რამდენიმე ჭრილობა, ყბაში ბეისბოლის ბიტა აქვს მოხვედრილი. ამის გარდა 10 კაცი ურტყამდა მუშტებს და წიხლებს.ეს არის ორგანიზებული ჯგუფი. ვეჭვობ ვიღაცამ დაურეკა, რის შემდეგაც ეს ტერორისტული აქტი მოახდინეს. წამებში მოხდა ყველაფერი, ჩემმა მეორე ძმამ და მისმა მეგობარმა რეაგირება ვერ მოასწრეს, მეგობარს თავზე ბოთლი გადაამტვრიეს, ის ადგილზე გაითიშა"- აცხადებს დაჭრილის ძმა, გიორგი უგრეხელიძე.

როგორც ირკვევა, სისხლიან დაპირისპირებას წინ ილია უგრეხელიძესა და რამდენიმე ახალგაზრდას შორის საბურთალოზე მომხდარი გარჩევა უძღოდა.

დაშავებულის ძმა აცხადებს, რომ აღნიშნულ დაჯგუფებას თავდასხმის მცდელობა ილია უგრეხელიძის მიმართ რამდენიმე დღის წინაც ჰქონდათ, თუმცა მაშინ ახალგაზრდამ გაქცევა მოასწრო.

"საბურთალოელები არიან, მოტივი იყო ის რომ იმათ ამის დაჩაგვრა უნდოდათ და ამან არ დააჩაგვრინა..."- ამბობს დაჭრილის ძმა, რომელიც ეჭვობს, რომ დამნაშავეებს "ვიღაცა მფარველობს".

"ვიღაცა მფარველობს, რომ ასეთ რაღაცას ბედავენ. კანონის არ ეშინიათ, ავტორიტეტი არ ჰყავთ. გარშემო არავინ აინტერესებთ დაცვა შეანგრიეს და გააკეთეს საქმე"- აღნიშნავს გიორგი უგრეხელიძე.

საცურაო აუზ "შტაბის" მენეჯერი აცხადებს, რომ მისი ინფორმაციით, მომხდარი წარსულში არსებულ უთანხმოებას უკავშირდება.

თედო მინდორაშვილი აღნიშნავს, რომ დაწესებულების ტერიტორიაზე კონფლიქტი არ ყოფილა.

"ჩვენს სტუმარს მოაკითხეს უცხო პიროვნებებმა, როგორც გავიგე გარეთ გასვლა სთხოვეს, ეს ბიჭი არ გაჰყვა და შემდეგ შემოვიდნენ ძალით"- თქვა "შტაბის" მენეჯერმა.