კრიმინალური ზავი - ,,კანონიერი ქურდები“ რუსეთში მსოფლიო ჩემპიონატს საპატიო სტუმრის სტატუსით ესწრებიან

კრიმინალი - 16:34, 04 Jul, 2018

4673

რუსეთში მიმდინარე საფეხბურთო ჩემპიონატი, პრაქტიკულად, კრიმინალის გარეშე ტარდება. რა თქმა უნდა, არის შემთხვევები, როცა რომელიმე ტურისტი კრიმინალზე პოლიციასთან ჩივის, მაგრამ უმრავლეს შემთხვევებში, საქმე წვრილმან ქურდობასთან ან ტელეფონის დაკარგვასთან გვაქვს.

როგორც ირკვევა ქურდების პასიურობა მსოფლიო ჩემპიონატის მიმდინარეობისას უშიშროების დამსახურებაა. „კა-გე-ბეს“ მაღალჩინოსნებმა ჩემპიონატამდე ერთი თვით ადრე, მოსკოვში მყოფი ყველა კანონიერი ქურდი დაიბარეს და გააფრთხილეს, რომ თუ მსოფლიო ჩემპიონატის მიმდინარეობისას კრიმინალის დონე მოიმატებდა, მისი დასრულების შემდეგ, ყველა კანონიერი ქურდი გისოსებს მიღმა აღმოჩნდებოდა. ქურდებმაც ტკბილი ცხოვრების გამწარება არ ისურვეს და ყველა, ვისზეც კი ხელი მიუწვდებოდათ, გააფრთხილეს, რომ ქურდობისგან თავი შეეკავებინათ. რაც შეეხება შაკირას გაქურდვას, მთელმა ქურდულმა სამყარომ იწვალა, მაგრამ დანმაშავეების კვალს ვერ მიაგნო.

რუსული მედიის ინფორმაციით, კრიმინალური ზავის შედეგად ქურდებმა საინტერესო რამ მიიღეს. ისინი ძლიერი ნაკრების მატჩებს საპატიო სტუმრის სტატუსით ესწრებიან, სტადიონებზე დაცვითა და დაჯავშნული ლიმუზინებით მიდიან, საპატიო სტუმრებთანშინაურულად იქცევიან და ძალიან ბედნიერები არიან. ერთი ეგაა, ბევრი ექსპერტი ვარაუდობს, რომ კანონიერი ქურდების გაწმენდის პროცესს, რომელიც ერთი წლის წინ დაიწყო, მსოფლიო ჩემპიონატის დასრულების შემდეგ, რუსეთის ხელისუფლება მაინც ბოლომდე მიიყვანს და ქვეყანას კრიმინალებისგან საბოლოოდ გაწმენდს. მათივე ინფორმციით, ძალაუფლება რუსეთში მთლიანად უშიშროების სამსახურს აქვს ხელში და მის დათმობას აღარ აპირებს.

წყარო: გაზეთი "ვერსია".