62 წლის მამაკაცი პოლიციას ზეწოლაში ადანაშაულებს და აცხადებს, რომ გამუდმებული ზეწოლისა და შევიწროების გამო მან თვითმკვლელობა სცადა. იმ პოლიციელების საქმეს, რომელთაც სერგო ხასოევი თვითმკვლელობამდე მიყვანაში ადანაშუალებს , გენერალური ინსპექცია სწავლობს.

ხასოევის თქმით ის ნასამართლევია სასჯელს ქურდობის ბრალდებით იხდიდა და ციხე 2016 წელს დატოვა. მისი განცხადებით ის ამ პერიოდიდან განიცდის პოლიციელების მხრიდან მუდმივ ზეწოლას, ბოლო ინციდენტი კი 2 კვირის წინ მოხდა, რასაც მისი მხრიდან თვითმკვლელობის მცდელობა მოჰყვა.

როგორც ხასოევი აცხადებს, ის 7 ივნისს უფასო სასადილოდან მოდიოდა, როდესაც გაჩერებაზე მასთან პოლიციელები მივიდნენ და საბუთები მოსთხოვეს, შემდეგ მანქანაში ჩასვეს და კრწანისში პოლიციის განყოფილებაში გადაიყვანეს. მისი თქმით, გზაში პოლიციელები მას გამუდმებით ურტყამდნენ, რის გამოც მისი საავადმყოფოში გადაყვანა გახდა საჭირო. საბოლოოდ ხასოევის მიმართ, პოლიციელებისთვის წინააღმდეგობის გაწევის მუხლით აღიძრა საქმე. ხასოევი ამბობს, რომ ამ ინციდენტის შემდეგაც არ შეწყვეტილა კრწანისის განყოფილების პოლიციელების მხრიდან ზეწოლა და დღეს მან ემოციურ ნიადაგზე თვითმკვლელობა სცადა, სუიციდისგან ის ოჯახის წევრმა იხსნა.

„ჩამაგდეს მანქანაში, კრწანისამდე სანამ ავიდოდი, შიგ მანქანაში მცემეს, მანქანა იყო შკოდა. მირტყამდნენ თავში. ახლაც მაწუხებენ, დანა დავირტყი, მეთქი აღარ მინდა სიცოცხლე, ამან მომასწრო და წამართვა დანა.“- განაცხადა ხასოევმა.

დღეს მომხდარ ინციდენტთან დაკავშირებით გამოძიება 115-ე (თვითმკვლელობამდე მიყვანის) მუხლითაა დაწყებული.