ინგოროყვას საუნივერსიტეტო კლინიკაში მომხდარი შემთხვევა - ექიმ-ტრავმატოლოგი მურთაზ მამაგეიშვილი გუშინ ეთიკური კომისიის გადაწყვეტილებით სამსახურიდან იქნა გათავისუფლებული. საუბარია ორი დღის წინ მომხდარ შემთხვევაზე.

„ერთიანი ნაციონალური მოძრაობის“ წევრის ნინო კვიტაიშვილის განცხადებით, მას მამაგეიშვილმა სამედიცინო მომსახურებაზე უარი პოლიტიკური კუთვნილების გამო უთხრა.

კვიტაიშვილის განცხადებით, მან დაბეჟილობები სხეულზე პარლამენტის წინ აქციის დროს სამართალდამცავებთან დაპირისპირებისას მიიღო, ამის შემდეგ ინგოროყვას საუნივერსიტეტო კლინიკას მიმართა, მურთაზ მამაგეიშვილმა კი განუცხადა, რომ „უფრო მეტი უნდა მოხვედროდა“. ამის გამო კვიტაიშვილმა ინგოროყვას კლინიკის ადმინისტრაციას მიმართა და ექიმი-ტრავმატოლოგი ეთიკის ნორმების დარღვევაში დაადანაშაულა. ეთიკის საბჭომ გუშინ მიიღო გადაწყვეტილება და მამაგეიშვილი გაათავისუფლეს, ასევე მიმართეს ჯანდაცვის სამინისტროს, შეისწავლოს ფაქტი და საკუთარი კომპეტენციის ფარგლებში მიიღოს გადაწყვეტილება შეუჩერდება თუ არა ლიცენზია ექიმ-ტრავმატოლოგს და რა ხანგრძლივობით.

მედიაჰოლდინგ „კვირის“ პრესკლუბში ექიმმა-ტრავმატოლოგმა მურთაზ მამაგეიშვილმა მომხდარზე ისაუბრა. მისი თქმით, კვიტაიშილს არ აღენიშნებოდა დაზიანებები, მაგრამ პაციენტი ცნობაში გაცილებით სერიოზული დაზიანებების მითითებას ითხოვდა, ამის ფონზე კი მან პაციენტს განუცხადა: „მეტი დაზიანებები რომ იყოს, მეტი უნდა ექნათ და მაშინ დაფიქსირდებოდა ეს ყველაფერიო“. მამაგეიშვილი აცხადებს, რომ კვიტაიშვილმა მისი სიტყვების ინტერპრეტირება მოახდინა.

„ყველა დანაშაულს აქვს თავისის სასჯელი, ვთქვათ, იყო ეთიკის ნორმების დარღვევა, ხომ არ უნდა დამხვიტრონ ამისთვის და ექიმობა ამიკრძალონ? ბატონმა გოჩამ, ალბათ, დაიჯერა, რომ ეს ასე იყო, ვისი ინტერესები იყო, არ ვიცი, ფაქტი ფაქტად მოხდა. განმიცხადა განთავისუფლებ სამსახურიდან ეთიკური ნორმების დარღვევის გამოო“, - განაცხადა მამაგეიშვილმა.