რუსთაველის გამზირზე, პარლამენტის შენობის წინ, საპროტესტო აქციის ფარგლებში კარვების დაშლისა და დაკავებების საკითხს მესამე სექტორი ეხმაურება. სამოქალაქო სექტორის განცხადებით, აღნიშნული ქმედებები კანონს ეწინააღმდეგებოდა და შესაბამისი რეაგირებაა საჭირო.

არასამთავრობო ორგანიზაციების წარმომადგენლები პარლამენტის დეპუტატის დაკავებასაც ეხმაურებიან და მოუწოდებენ უწყებას, ნიკა მელიას დამატებით განემარტოს, რა ღონისძიება იყო მის წინააღმდეგ გამოყენებული.

სამოქალაქო სექტორი ამ საკითხების, ასევე ხორავას ქუჩის მკვლელობის შესახებ დეტალურ ინფორმაციას დღეს დიპლომატიური კორპუსის წარმომადგენლებს მიაწვდის.

„აუცილებლად იქნება საუბარი მთავარი პროკურორის შერჩევასთან დაკავშირებით, მათ შორის იმაზე, თუ რატომ არ მივიღეთ ამ პროცესში მონაწილება. ასევე ბოლო დროინდელი მოვლენები, ის საპროტესტო აქციები, რომელიც იმართება რუსთაველზე“- აცხადებს საქართველოს ახალგაზრდა იურისტთა ასოციაციის თავმჯდომარე სულხან სალაძე.