რუსთაველის გამზირზე ზვიად კუპრავას დაკავების ფაქტს ზაზა სარალიძე ეხმაურება და აცხადებს, რომ ყოფილი პოლიციელი პოლიციელს შეურაცხყოფას არასდროს მიაყენებს.

ზაზა სარალიძეს შინაგან საქმეთა სამინისტროს მიერ გავრცელებული ინფორმაციის არ სჯერა.

„ყოფილი პოლიციელი არასდროს მიაყენებს პოლიციელს შეურაცხყოფას. მეც ყოფილი პოლიციელი ვარ და არასდროს მივაყენებ ფორმიანს შეურაცხყოფას, რაც არ უნდა მოხდეს”, – განაცხადა ზაზა სარალიძემ.

მისივე თქმით კარვების აღებას საავტომობილო გზიდან არ აპირებს:

„რაც შეეხება კარვების აღებას, არ ვიცი ეს ინფორმაცია საიდან არის, რომ თითქოს კარვების აღებას აპირებს ვინმე. მე არ ვაპირებ არსად წასვლას, ძალით თუ დააპირებენ რამეს მოვიდნენ, პრობლემა არ არის, აქ ვიქნები ბოლომდე. თავად მაიძულეს ეს ნაბიჯი გადამედგა ძალოვანი უწყებების წარმომადგენლებმა, პირადად გახარიამ. ესენი ცდილობენ ამ საქმის სხვანაირად შეფუთვას”, – განაცხადა სარალიძემ.

ზაზა სარალიძემ დღეს 14:00 საათზე მთელ საქართველოს აქციაზე მისვლისკენ მოუწოდებს.