დღეს კონკურსის “მისია 2018” ფინალი და დაჯილდოების ცერემონია გაიმართება

საზოგადოება - 10:01, 07 Jun, 2018

1098

7 ივნისს, 12:00 საათზე ივანე ჯავახიშვილის სახელობის თბილისის სახელმწიფო უნივერსიტეტში სტუდენტური კონკურსის - „მისია 2018“ ფინალური ტური და დაჯილდოების ცერემონია გაიმართება.

ფინალში გასული 5 გუნდი ჟიურის წინაშე პარტნიორი კომპანიის დავალებაზე - „დირსის ზაფხულის ქალაქი“, შესრულებული პრეზენტაციებით წარდგება. ჟიურის შემადგენლობაში არიან უნივერსიტეტის რექტორი გიორგი შარვაშიძე, კომპანია „ას ჯორჯიას“ დირექტორი ბესიკ ჯიქურაული და მოწვეული წევრები - Forbes Georgia-ს მთავარი რედაქტორი გიორგი ისაკაძე, „ჯეოსელის“ კორპორაციული კომუნიკაციების ექსპერტი თაკო როდონაია, VEON საქართველოს პარტნიორებთან ურთიერთობის მენეჯერი და კონკურსის „მისია“ 2011 წლის გამარჯვებული თეიმურაზ ბაბუციძე.

თსუ-ს სტუდენტური კონკურსი მარკეტინგსა და პიარში უნივერსიტეტის ყოველწლიური პროექტია, რომელსაც უნივერსიტეტი და წარმატებული ქართული ბრენდი ერთობლივად ახორციელებენ. ყოველწლიურად კონკურსის მონაწილე ბრენდი იცვლება და კონკურსანტები ახალ იდეებს ახალი პარტნიორისთვის ქმნიან. 2018 წელს კონკურსის თანაორგანიზატორი კომპანია „ას ჯორჯიაა“, რომელიც წარმოდგენილია სამშენებლო კომპლექსით „დირსი“.

ჟიური სამ საუკეთესო გუნდს გამოავლენს, გამარჯვებულებზე პარტნიორი კომპანიის მიერ დაწესებული კონკურსის საპრიზო ფონდი 5000 ლარი გადანაწილდება: პირველი ადგილის მფლობელი გუნდი 2500 ლარს მიიღებს, ხოლო მეორე და მესამე ადგილის მფლობელ გუნდებზე შესაბამისად 1500 და 1000 ლარი განაწილდება.

ფინალში გასულ ყველა მონაწილეს კონკურსის სერტიფიკატები და ორგანიზატორების სამახსოვრო საჩუქრები გადაეცემა.

კონკურსის მიზანია სტუდენტების ახალი იდეების განხორციელებისა და პროფესიული განვითარების ხელშეწყობა, კონკურსის გამარჯვებული სტუდენტების პარტნიორ კომპანიასთან თანამშრომლობის უზრუნველყოფა და სამომავლო დასაქმების პერსპექტივის ზრდა. კონკურსანტებს საშუალება ეძლევათ გახდნენ კომპანიის მარკეტინგისა და პიარის ვირტუალური მენეჯერები, დაგეგმონ კონკრეტული აქტივობები, გაიმარჯვონ კონკურსში, მოიპოვონ ფულადი პრემია და განახორციელონ თავიანთი იდეები.

სტუდენტურ კონკურსში 2018 წელს მონაწილეობა უნივერსიტეტის სხვადასხვა ფაკულტეტის 56-მა გუნდმა მიიღო, შემოსული პროექტებიდან შიდაშესარჩევმა ჟიურიმ 5 საუკეთესო გამოავლინა. ფინალური დავალების შესრულების პროცესში კონკურსანტებისთვის უნივერსიტეტისა და კომპანიის წარმომადგენლებმა სპეციალური ტრენინგები და სემინარები ჩაატარეს. კონკურსი წელს მეექვსედ ჩატარდა. გასულ წლებში კონკურსის პარტნიორი კომპანიები იყვნენ: „IDS ბორჯომი საქართველო“, „გეოპლანტი“, „ნატახტარი“, „სანტე“ და „თიბისი ბანკი“.

მის: თბილისის სახელმწიფო უნივერსიტეტის პირველი კორპუსი, მესამე სართული, საგამოფენო დარბაზი.