„წლების წინ სასაფლაოზე ადამიანი აწამა” - მუხრანში მომხდარი სისხლიანი გარჩევის დეტალები

კრიმინალი - 16:17, 04 Jun, 2018

11732

"ნიუპოსტისთვს" მუხრანში მომხდარი სისხლიანი გარჩევის დეტალები ხდება ცნობილი. დაჭრილია 25 წლის გიორგი ძმაორაშვილი, რომლის მდგომარეობა უკიდურესად მძიმეა.

დაჭრილს კიდურის ამპუტაცია ჩაუტარდა. მედიკოსები ახალგაზრდა მამაკაცის გადარჩენას ამ წუთებშიც ცდილობენ.

როგორც ირკვევა, სისხლიან გარჩევას წინ ე.წ. ქუჩური გარჩევა უძღოდა. დაჭრილი და ბრალდებული, რომელსაც პოლიცია ამ დრომდე ეძებს მეზობლები არიან.

გიორგი ძმაორაშვილის ახლობელი, რომელმაც ვინაობის გასაჯაროება არ ისურვა, „ნიუპოსტთან“ ამბობს, რომ ბრალდებულს დაჭრილის მეგობართან მოუვიდა უთანხმოება, რის შემდეგაც ძმაორაშვილის მეგობრებმა ის გარჩევაზე დაიბარეს, ამ უკანასკნელმა კი გიორგი ძმაორაშვილი ცეცხლსასროლი იარაღიდან გასროლით დაჭრა და მიიმალა.

„ყველაფერი მომხდარის წინა დღეს განვითარებული მოვლენებით დაიწყო, როცა ბრალდებულმა, ვინმე გუკამ ფიზიკური შეურაცხყოფა მიაყენა გიორგის სამეგობროს, რის შემდეგაც მოხდა აღნიშნული გარჩევა, უთქვამს შემეშვით თორემ გესვრითო, ამის შემდეგ დაჭრა გიორგი და მიიმალა. დაჭრილი მოჭიდავე, ჩემპიონის გიორგი ბაინდურაშვილის მეგობარია“- აცხადებს დაჭრილის ახლობელი.

ბრალდებულს მუხრანში უარყოფითად ახასიათებენ და ამბობენ იმასაც, რომ სოფელში კრიმინალურმა შემთხვევებმა საგრძნობლად იმატა.

„წლების წინ სასაფლაოზე ადამიანი აწამა”- აცხადებენ ადგილობრივები.

სოციალურ ქსელში გიორგი ძმაორაშვილის დამ წერილი გამოაქვეყნა და მოსახლეობას დახმარებისკენ მოუწოდა, რომ მძიმე მდგომარეობაში მყოფმა ახალგაზრდამ მკურნალობის გაგრძელება საზღვარგარეთ შეძლოს

“მეგობრებო,ისე როგორც არასდროს ახლა თქვენი დახმარება გვჭირდება, ჩემს 25 წლის ძმას გიორგი ძმაორაშვილს 30 მაისს, ცეცხლსასროლი იარაღით მიყენებული ჭრილობის შედეგად ჩაუტარდა ოპერაცია, დაზიანდა მუცლის ღრუს არტერია, რამაც გამოიწვია მარჯვენა კიდურის (ფეხის) ამპუტაცია, მდგომარეობა რჩება მძიმე, იმყოფება მართვით სუნთქვაზე!

ძალიან გთხოვთ, ახლა ყველაზე მეტად თქვენი დახმარება გვჭირდება!!!

საბანკო ანგარიშის რეკვიზიტებია: TBCBGE 22

ანგარიშსწორების ანგარიში: GE67TB7140436515100008

მიმღები მიუთითეთ მხოლოდ -ნოდარ ტუღრიაშვილი“- წერს პაციენტის და.

როგორც "ნიუპოსტს" შინაგან სამეთა სამინისტროში განუცხადეს, მომხდართან დაკავშირებით გამოძიება სისხლის სამართლის კოდექსის 117-ე მუხლით დაიწყო, რაც ჯანმრთელობის განზრახ მძიმე დაზიანებას გულისხმობს. დამნაშავის დასაკავებლად საგამოძიეო მოქმედებები მიმდინარეობს. შემთხვევა 30 მაისს მოხდა.