ძიუდოისტებმა ხორავაზე მოკლული დავით სარალიძის ოჯახს სოლიდარობა გამოუცხადეს. აღსანიშნავია, რომ მათ პარლამეტთან მიმდინარე აქცია, რომლის ფარგლებშიც კვლავ ძიუდოს ფედერაციის პრეზიდენტის გადადგომას მოითხოვდნენ, დროზე ადრე დაასრულეს. სპორტსმენებმა პარლამენტის მიმდებარე ტერიტორია ზაზა სარალიძესა და მის მხარდამჭერებს დაუთმეს და მას თავადაც შეუერთდნენ.

„უდიდესი ტკივილია ჩვენთვის ეს რაც მოხდა მათ ოჯახში. ჩვენ სრულ მხარდაჭერას და თანადგომას ვუცხადებთ მათ. ჩვენ შეგვეძლო ღამის 12 საათამდე ვყოფილიყავით აქ, მაგრამ მამამისის თხოვნით, ჩვენ მათ მივეცით საშუალება, რომ დაგვეთმო სცენა მათთვის,“-განაცხადა ვარლამ ლიპარტელიანმა.

რაც შეეხება სპორტსმენების აქციას, ძიუდოისტები კვლავ ფედერაციის პრეზიდენტის დავით ქევხიშვილის გადადგომას ითხოვენ.

„ფედერაციას კი არ უნდა მართავდნენ, ფედერაცია უნდა ედგეს ადამიანებს, ძიუდოისტებს გვერდით. ვფიქრობ რომ გაგრძელდება აქციები, სანამ ეგ ადამიანი არ დატოვებს იმ თანამდებობას, რაც უკავია. თუმცა მე ვფიქრობ, რომ ის აღარ არის ძიუდოს ფედერაციის პრეზიდენტი. ის დიდი ხანია სადღაც სოროდან აკეთებს განცხადებებს,“-განაცხადა ოლიმპიურმა ჩემპიონმა ზურაბ ზვიადაურმა.