რუსთავში საქართველოს დამოუკიდებლობის დღის აღსანიშნავად ემზადებიან

საზოგადოება - 17:42, 25 May, 2018

1963

26 მაისს, რუსთავში, საქართველოს პირველი დემოკრატიული რესპუბლიკის დაარსების 100 წლის იუბილესთან დაკავშირებით, მთელი დღის განმავლობაში სხვადასხვა საზეიმო ღონისძიებები გაიმართება.

დილიდან კულტურისა და დასვენების ცენტრალური პარკის ჩასასვლელთან, პირამიდის მიმდებარედ სამხედრო ტექნიკა გამოიფინება. სადღესასწაულო ღონისძიებები 09:00 საათზე, პირამიდასთან, რუსთავის მერის, ირაკლი ტაბაღუას ახალგაზრდებთან შეხვედრით დაიწყება.

დამოუკიდებლობის დღისადამი მიძღვნილი ღონისძიებები 13:30 საათიდან კულტურისა და დასვენების პარკში გაგრძელდება. პარკის ტერიტორიაზე მოეწყობა რუსთაველი მხატვრების ნამუშევრებისა და ხელნაკეთი ნივთების გამოფენა, წიგნების კუთხე, ფოტოგამოფენა -„დამოუკიდებლობიდან თავისუფლებამდე'', ყვავილების ფესტივალი, ინტელექტუალური თამაში ,,რა, სად, როდის?’’, ფლეშმობი, ''Face art'', ანიმატორების შოუ, ქორეოგრაფიული კონცეერტი ანსამბლების - ,,სალხინო’ და მე რუსთველი’’ მონაწილეობით. ჩატარდება შეჯიბრი სკეიტპარკში, ტურნირი ჭადრაკში და სხვადასხვა სპორტული თამაშები.

17:10 საათზე, პარკში მდებარე ამფითეატრის სცენიდან რუსთაველებს დამოუკიდებლობის 100 წლის იუბილეს ქვემო ქართლის გუბერნატორი გრიგოლ ნემსაძე და რუსთავის მერი ირაკლი ტაბაღუა მიულოცავენ. 17.15 საათზე კი, ზუსტად იმ დროს, როცა 1918 წლის 26 მაისს საქართველოს დამოუკიდებლობა გამოცხადდა,საზაფხულო კინოთეატრის სცენაზე, დამოუკიდებლობის 100 წლისთავისადმი მიძღვნილი ზეიმის მთავარი ღონისძიებება -საქართველოს დამოუკიდებლობის აქტის გამოცხადების ამსახველი ინსცენირებული წარმოდგენა გაიმართება.

26 მაისის სადღესასწაულო პროგრამას დღის ბოლოს კონცერტი დაასრულებს.

კონცერტი ამფითეატრში 19:30 საათზე დაიწყება და მასში ანსამბლი ,,სალხინო’’, ,,თუთარჩელა’’, მომღერალი ბაკო ალანია, მუსიკალური ჯგუფები - ,,გრუვერსი’’, ,,გროსოქტეტი’’, ,,ბისაიდს’’ მიიღებენ მონაწილეობას.