"შეუძლებელია, ამ ადამიანთან მუშაობა" - ძიუდოისტები ქევხიშვილის შეთავაზებებს ეხმაურებიან

სპორტი - 12:31, 24 May, 2018

5166

საქართველოს ძიუდოისტთა ნაკრების კაპიტანი ვარლამ ლიპარტელიანი მიიჩნევს, რომ ძიუდოს ფედერაციის პრეზიდენტი დღეს გაკეთებული შეთავაზებებით ჩიხიდან გამოძრობას ცდილობს, რომელშიც თავისივე ქმედებების გამო მოხვდა. აღნიშნული განცხადება დღეს გამართულ საპროტესტო აქციაზე გაკეთდა, რომელიც ქევხიშვილის გადადგომის მოთხოვნით უკვე თითქმის ერთი თვეა მიმდინარეობს.

„ის რომ დავით ქევხიშვილი ახლა აკეთებს შეთავაზებებს, ეს ცოტა უხერხულია სპორტსმენებისთვის, იმიტომ რომ ერთ თვეზე მეტია მიმდინარეობს ეს პროტესტი. მას თავიდანვე შეეძლო შეთავაზებების გაკეთება. რადგან სიტუაცია ჩიხშია შესული, ის ცდილობს გამოძრომას და თავისი თავის გადარჩენას. ჩვენ არავის დაღუპვა არ გვინდა, ჩვენ გვინდა დავით ქევხიშვილმა დატოვოს დაკავებული თანამდებობა, გამომდინარე იქიდან, რომ ის იყო ერთპიროვნული მმართველი, თვითონ იღებდა ყველა გადაწყვეტილებას. ვფიქრობთ, არანაირ შეთავაზებას და მასთან კომპრომისზე წასვლას აზრი არ აქვს, იმიტომ რომ შეუძლებელია, მაგ ადამიანთან მუშაობა.“- განაცხადა ვარლამ ლიპარტელიანმა.

ლიპარტელიანის თქმით, ფედერაციის პრობლემები ძიუდოს სპეციალისტებმა უნდა გადაწყვიტონ და არა სპორტსმენებმა, ამიტომ ისინი არ ეთანხმებიან ქევხიშვილის შეთავაზებას იმასთან დაკავშირებით, რომ ქევხიშვილის თანაშემწედ მათი ნდობით აღჭურვილი პირი დაინიშნოს:

„ჩვენი მხრიდან ვინმეს მიყვანაზე, ვინმეს დანიშვნასა და სიტუაციის კონტროლზე საუბარი ზედმეტია. ჩვენ არ უნდა ვიღებდეთ ამ გადაწყვეტილებებს, რადგან ჩვენ ვართ სპორტსმენები. ჩვენ საკუთარი პოზიცია დავაფიქსირეთ, ვისაც უშუალოდ შეხება გვქონდა დავით ქევხიშვილთან. ჩვენ დავასახელეთ პრობლემები, კერძოდ ერთპიროვნული გადაწყვეტილებები, მწვრთნელების კომპეტენციაში ჩარევა და უამრავი მიმართულებით არასწორი მიდგომა.

თუ ქევხიშვილი კიდევ ვერ ხვდება, რომ ჩვენ საფუძვლიანი პრეტენზიები გვაქვს და ეს თითიდან გამოწოვილი პრეტენზიები არ არის, მაშინ მასთან მუშაობა შეუძლებელია.

გადაწყვეტილება იმ ადამიანებმა უნდა მიიღონ, ვისაც სპორტი შეუქმნია და არა სპორტსმენმა ან მის მიერ მიყვანილმა ადამიანმა.“- აღნიშნა ლიპარტელიანმა.

დავით ქევხიშვილმა სპორტსმენებს 5 პუნქტიანი შეთავაზება „ფეისბუქის“ საშუალებით წარუდგინა.