რატომ ხდება გარდაცვლილის მჯდომარე მდგომარეობაში დაკრძალვა

რატომ ხდება გარდაცვლილის მჯდომარე მდგომარეობაში დაკრძალვა - სპეციალისტების განმარტება

საზოგადოება - 11:59, 16 May, 2018

9516

სასაფლაოების მოწყობისა და მოვლა პატრონობის წესის დადგენილებაში არსებულ პუნქტს, რომელიც მიცვალებულის მჯდომარე მდგომარეობაში დაკრძალვის რეგულაციას ეხებოდა, ბოლო დღეებში დიდი გამოხმაურება მოჰყვა. კრიტიკის და ხუმრობის სამიზნე ზუგდიდის საკრებულო გახდა, რომელმაც ეს დადგენილება მიიღო, მანამდე მსგავსი დადგენილება აქვს მიღებული სხვა ქალაქების საკრებულოებსაც - თბილისის საკრებულოს 2014 წლის 30 დეკემბერს, ბათუმის საკრებულოს 2010 წლის 29 ოქტომბერს, სენაკის საკრებულოს 2015 წლის აპრილს, ქუთაისის საკრებულოს 2011 წლის 30 ნოემბერს, გარდაბნის საკრებულოს 2016 წლის 30 აგვისტოს.

როგორც სპეციალისტები განმარტავენ, დაკრძალვის ასეთი წესი გამონაკლის შემთხვევებში გამოიყენება და მიცვალებულის მსგავსი წესით დაკრძალვა მისი სამედიცინო მდგომარეობიდან გამომდინარე ხდება. კერძოდ, როდესაც გარდაცვლილის ბუნებრივი მდგომარეობა არ იძლევა იმის საშუალებას, რომ დაიკრძალოს სხვა მდგომარეობაში. ეს მდგომარეობა კი გამოწვეულია იმით, რომ ავადმყოფი დიდი ხნით მჯდომარე პოზაში იმყოფება. გარდაცვალების შემდეგ ადამიანის სხეულის გასწორების საშუალება მხოლოდ ძვლების გადატეხვაა, რაც ჭირისუფალს არაჰუმანურად მიაჩნია და ხდება მიცვალებულის მჯდომარე პოზაში დაკრძალვა.

შეგახსენებთ, საკრებულოების მიერ მიღებული დადგენილების თანახმადაც გარდაცვლილის მჯდომარე მდგომარეობაში დაკრძალვისას მიწის შრე გვამზე საფლავსზედა ყრილის ჩათვლით უნდა იყოს სულ ცოტა 1 მეტრი.