თსუ-ში გამოფენა „უნივერსიტეტის თეატრი

თსუ-ში გამოფენა „უნივერსიტეტის თეატრი - 100“ გაიხსნება

საზოგადოება - 10:50, 15 May, 2018

1409

15 მაისს, 15:00 საათზე ივანე ჯავახიშვილის სახელობის თბილისის სახელმწიფო უნივერსიტეტში გამოფენა „უნივერსიტეტის თეატრი - 100“ გაიხსნება, რომელსაც თსუ რექტორი გიორგი შარვაშიძე და საქართველოს კულტურისა და სპორტის მინისტრი მიხეილ გიორგაძე, მოწვეული სტუმრები დაესწრებიან.

გამოფენაზე მოსული დამთვალიერებელი გაეცნობა თეატრის დაარსების ისტორიას. ექსპოზიციაზე წარმოდგენილი იქნება სხვადასხვა წლებში დასის მოღვაწეობის ამსახველი ფოტოები, აფიშები, თეატრალური ესკიზები, ჟურნალ-გაზეთები, სიგელები, თეატრალური კოსტიუმები.

თბილისის სახელმწიფო უნივერსიტეტის დაარსებიდან მალევე ჩამოყალიბდა სტუდენტური შემოქმედებითი წრეები, რამაც საფუძველი ჩაუყარა სტუდენტურ დასს. 1918 წლის მაისში უნივერსიტეტის ერთ-ერთი პირველი „კულტურული ღონისძიება“ მე-20 საუკუნეში გამოჩენილი მსახიობის ვიქტორ გამყრელიძის სასცენო მოღვაწეობის 30 წლის იუბილე იყო. უნივერსიტეტი ასევე გამოეხმაურა მსახიობ ნინო ჩხეიძის 25 წლის იუბილეს. 1919 წლიდან თბილისის სახელმწიფო უნივერსიტეტში დაარსდა ქართული მუსიკის კათედრა, ლექტორად კი იმ დროს უკვე ძალიან ცნობილი, საქართველოს დემოკრატიული რესპუბლიკის ჰიმნის ავტორი კომპოზიტორი კოტე ფოცხვერაშვილი მიიწვიეს. ამ დროსვე დაარსდა თეატრალური დასი, რომლის რეჟისორად ალექსანდრე წუწუნავა მოიწვიეს.

გამოფენაზე წარმოდგენილი საგამოფენო მასალა დაცულია თსუ ბიბლიოთეკაში, მუზეუმში, კულტურისა და სპორტის დეპარტამენტში.

ღონისძება ივანე ჯავახიშვილის სახელობის თბილისის სახელმწიფო უნივერსიტეტის 100 წლის იუბილეს ეძღვნება.

მისამართი: ი.ჭავჭავძის გამზ.1, თსუ I კორპუსი, სააქტო დარბაზის ფოიე.