"პირადად მოვთხოვთ კითხვებზე პასუხს"- ძიუდოისტები კომისიის შექმნას მიესალმებიან და ყრილობაზე დასწრებას გეგმავენ

სპორტი - 12:47, 10 May, 2018

6962

ძიუდოში მიმდინარე მოვლენების შესასწავლად კომისიის შექმნას ძიუდოისტები მიესალმებიან, მათი თქმით სასურველია, რომ კომისიამ გადაწყვეტილება რაც შეიძლება მალე მიიღოს, რადგან შექმნილი ვითარების გამო, ძიუდოისტები ზარალდებიან.

„ვუსმინეთ მინისტრს, მოვისმინეთ მათი აზრი, დიდი მადლობა მინდა გადავუხადო აქტიურად ჩართვისთვის. რაც შეეხება კონკრეტულ სიტუაციას, ჩვენ მივდივართ ბილტმორში, ყველა ერთად და იქ გავესაუბრებით ბატონ დავითს. დავუსვამთ შეკითხვებს, რაც იყო დაგროვილი. როგორც ის ამბობს არანაირი პრობლემა არ ყოფილა. კიდევ ერთხელ დავუდასტურებთ ჩვენს პოზიციას, გავაცნობთ პრობლემებს და ვნახოთ რა პასუხს გაგვცემს“- განაცხადა ძიუდოს ნაკრების კაპიტანმა ვარლამ ლიპარტელიანმა.

ძიუდოისტ ავთანდილ ჭრიკიშვილის თქმით, გადაწყვეტილების მიღება მალე უნდა მოხდეს, რადგან სპორტსმენებს ვარჯიშები უცდებათ:

„ეს ინიციატივა ჩვენთვის მისაღებია, ჩვენ იმასაც ვითავისებთ, რომ ეს იურიდიულად სწორად ხდება, მაგრამ ჩვენ ყოველდღე გვაკლდება ვარჯიში, არ შევდივართ ტატამზე. მე ვფიქრობ, რომ ცოტა უფრო მალე უნდა მოხდეს გადაწყვეტილებების მიღება, დღეს ჩვენ მივდივართ და პირადად მოვთხოვთ იმ კითხვებზე პასუხის გაცემას, რომელიც ჩვენ გვაქვს, ის ამბობს, რომ არანაირი პრობლემა არ არსებობს და ყველაფერს ლამაზად ხატავს, ამ ლამაზი ნახატის უკან კი სულ სხვა რეალობაა.“- განაცხადა ავთანდილ ჭრიკიშვილმა.

შეგახსნებთ, საქართველოს ძიუდოს ნაკრების წევრთა უმრავლესობა, ფედერაციის პრეზიდენტის გადადგომას ითხოვს, მათი თქმით, ქართულ ძიუდოში შექმნილი სავალალო ვითარება სწორედ დავით ქევხიშვილის არასათანადო მუშაობის შედეგია.