რუსთავის მერმა ირაკლი ტაბაღუამ რუსთაველ ვეტერანებს ფაშიზმზე გამარჯვების 73-ე წლისთავი მიულოცა

საზოგადოება - 14:29, 09 May, 2018

2043

ფაშიზმზე გამარჯვების 73-ე წლისთვისადმი მიძღვნილი ღონისძიება რუსთავის მერმა ირაკლი ტაბაღუამ, ქვემო ქართლის გუბერნატორის მოადგილე კახა კობერიძესთან ერთად, ვეტერანებისთვის პირადი მილოცვით დაიწყო.

ქალაქის მერი და გუბერნატორის მოადგილე მეორე მსოფლიო ომის ორ რუსთაველ მონაწილეს, მარგალიტა წერეთელსა და ბონდო მანჯგალაძეს სახლში ესტუმრნენ და სადღესასწაულო საჩუქრები გადასცეს.

მოგვიანებით კი, დიდების ხეივანში, 9 მაისისადმი მიძღვნილი ღონისძიება გაიმართა, რომელსაც ტრადიციულად მეორე მსოფლიო ომის ვეტერანები, ჩოხოსნები, რიგითი რუსთაველები და თვითმმართველობის წარმომადგენლები დაეწრნენ. რუსთავის მერმა, გუბერნატორის მოადგილემ და საკრებულოს თავმჯდომარის მოადგილე ნინო ქავთარაძემ გვირგვინებით შეამკეს გმირთა მემორიალი და პატივი მიაგეს მეორე მსოფლიო ომში დაღუპული ჯარისკაცების ხსოვნას.

რუსთავის ხარების სახელობის ტაძრის წინამძღვარმა მამა მიქაელ ჭაბაშვილმა, პანაშვიდი გადაუხადა მეორე მსოფლიო ომში დაღუპულ ჯარისკაცებს, შესრულდა სპეციალური საგალობლებიც.

ღონისძიების შემდეგ, ირაკლი ტაბაღუამ ვეტერანები სპეციალურად მათთვის გათვალისწინებულ სადღესასწაულო სადილზეც მიიწვია. რუსთავში დღეს მეორე მსოფლიო ომის 13 ვეტერანი და 47 ოცდაექვსიანელი ცხოვრობს.

რუსთავის მერის ინიციატივით, ვეტერანების სადღესასწაულო ფულადი ჯილდოს ოდენობა გაზრდილია. ომის მონაწილეებმა მერიისგან წელს 100-ის ნაცვლად 150, ხოლო ვეტერანებთან გათანაბრებულმა პირებმა 50-ის ნაცვლად 80 ლარი მიიღეს.