"ახალი საბანკო რეგულაციებით სესხის აღებას პენსიონერები და სტუდენტები ვერ შეძლებენ"

საზოგადოება - 16:15, 07 May, 2018

19769

დღეიდან სესხის გაცემის პროცედურა მკაცრდება - კომერციული ბანკებისთვის ეროვნული ბანკის ახალი რეგულაციების ამოქმედებისთანავე კომერციულ ბანკებს მომხმარებელთა გადამხდელუნარიანობის სრულფასოვანი ანალიზის გარეშე სესხების გაცემა ეზღუდებათ.

იმისათვის, რომ ფიზიკური პირის შემოსავალი ჩაითვალოს გაანალიზებულად, ბანკში წარდგენილ უნდა იქნეს სახელფასო ამონაწერი საბანკო ანგარიშიდან ან ცნობა შემოსავლების სამსახურიდან.

თუ მსესხებელი შემოსავალს იღებს სავაჭრო/სამეწარმეო საქმიანობიდან, ბანკს მოუწევს გადამხდელუნარიანობის დასადასტურებლად მისი საქმიანობის დეტალური ფინანსური ანალიზი ჩაატაროს.

ახალი საბანკო რეგულაციებით სესხის აღებას დღეიდან პენსიონერები და სტუდენტები ვერ შეძლებენ.

იურისტ ლევან ალაფიშვილის განცხადებით, პენსია, როგორც შემოსავალი, ახალი რეგულაციით ბანკისთვის ხდება არახელსაყრელი.

"პრობლემას ორი მხარე აქვს. პირველი ინსტიტუციურია, ეროვნული ბანკის რეგულაციის ქვეშ გასული წლიდან მოექცა არა მხოლოდ საბანკო სექტორი, არამედ სხვა ბიზნესი, რომელიც განვადებასთან ან სესხის გაცემასთან არის კავშირში. მეორე - სისტემურია. ამ რეგულაციებისა და შეზღუდვების შემოღებამდე არ არის შესწავლილი მათი გავლენა. მთავრობას პროგრამაში უწერია, რომ გავლენის შეფასების ე.წ. RIA-ს გარეშე არ შემოიღებდნენ ახალ რეგულაციებს. პენსიონერი ან სტუდენტი სესხს, რომ ვეღარ მიიღებს ამას რა მოჰყვება არ არის ჯეროვნად გააზრებული. პენსიონერს არ ექნება სესხი, მაგრამ სამაგიეროდ შეეზღუდება ან არ ექნება წვდომა მედიკამენტებზე, საკვებსა თუ კომუნალურ მომსახურებაზე. სტუდენტს არ ექნება სესხი, მაგრამ შეეზღუდება განათლებაზე წვდომა. რეგულაციების წინააღმდეგი არ შეიძლება იყო, მაგრამ ეს რეგულაციები გონივრული და გააზრებული უნდა იყოს. მთავრობა მისცემს სესხს იმ პენსიონერს ან სტუდენტს? რა თქმა უნდა არა", - განუცხადა imedinews-ს ლევან ალაფიშვილმა.