ძიუდოისტთა ეროვნული ნაკრებისა და ახალგაზრდული ნაკრების წევრები ვაკის პარკში აქციას მართავენ, ისინი ფედერაციის პრეზიდენტს დავით ქევხიშვილს ერთპიროვნულ მმართველობაში ადანაშაულებენ და მის გადადგომას მოითხოვენ. სპორტსმენები აცხადებენ, რომ თუ მათი მოთხოვნა არ დაკმაყოფილდება, ისინი ვარჯიშს შეწყვეტენ და საერთაშორისო შეჯიბრებებში მონაწილეობას აღარ მიიღებენ.

„ჩვენი მოთხოვნაა, რომ ბატონმა დავით ქევხიშვილმა თანამდებობა დატოვოს. ამისთვის ბოლომდე ვიბრძოლებთ. ფედერაციაში მისი ყოფნის პერიოდში პირადად მე არც შეკრების გავლას და არც შეჯიბრზე მონაწილეობას არ ვაპირებ. თავის დანებებაც რომ დამჭირდეს, ბოლომდე ვიბრძოლებ, რომ მან ფედერაცია დატოვოს,“ - განაცხადა ძიუდოისტმა ავთანდილ ჭრიკიშვილმა.

ნაკრების კაპიტნის, ვარლამ ლიპარტელიანის განცხადებით, ხორვატიაში ტურნირზე საკუთარი ხარჯებით იყო წასული, რის დასადასტურებლად მან დოკუმენტაცია წარადგინა.

"ის ადამიანი არ არის ძიუდოსთვის კარგი, მართავს ერთპიროვნულად. უამრავი ბრალდება და ცილისწამება მოვისმინეთ მისგან. იმის მერე, რაც სოციალურ ქსელში მოჰყვა გამოხმაურება, რომ ტურნირზე მე ჩემი ხარჯით მივდიოდი, მომიგზავნა ადამიანი და მითხრა, რომ გთხოვთ, შეიკავოთ თავი ხმამაღალი განცხადებებისგან და ამ ფულს მერე ჩვენ აგინაზღაურებთო. ეს თანხა რამდენიმე თვის მერე ჩაირიცხა. მე რომ საშუალება პირადულად არ მქონოდა, როგორ შევძლებდი ტურნირზე წასვლას,“ - განაცხადა ნაკრების კაპიტანმა, ვარლამ ლიპარტელიანმა.

აქციის მონაწილეებთან ერთად იმყოფება ოლიმპიური ჩემპიონი, ზურაბ ზვიადაური:

„ხედავთ, რამდენი ხალხია გამოსული. ეს კიდევ ზღვაში წვეთია, მთელი საქართველო ფეხზე დგას. გამოსავალს მე ვხედავ იმაში, რომ დავით ქევხიშვილი და მისი გუნდი, რომელიც არის კლანი, დატოვოს ფედერაცია. ამის შიში მაქვს, რომ ხალხმა, ქართველმა ადამიანებმა არ მოსთხოვონ ისე პასუხი, როგორც კადაფს მოსთხოვეს,“ - განაცხადა ზურაბ ზვიადაურმა.