საქართველოს ძიუდოს ფედერაციის პრეზიდენტი თანამდებობის დატოვებას არ აპირებს - დავით ქევხიშვილმა ამის შესახებ აღმასკომის სხდომის დასრულების შემდეგ ჟურნალისტებთან საუბრისას განაცხადა. საუბარია ძიუდოს ნაკრების წევრების მიერ მის მიმართ წაყენებულ ბრალდებებზე:

“თანამდებობას, ბუნებრივია, არავინ არის გამოკიდებული. თუმცა სპორტსმენების რაღაც ჯგუფი უსაფუძვლოდ ითხოვს ამას. რაც თვითონ სახელმწიფოსა და სისტემისთვის არ არის სწორი. ყველა საკითხში, რომელზეც ისინი საუბრობენ, მართალი ვარ და ტყუილად მწამებენ ცილს. ჩემი მხრიდან, მათთან მიმართებაში მხოლოდ გვერდში დგომა და პატივისცემა იყო გამოხატული. კარგია, რომ გაირჩეს მტყუან-მართალი და კონკრეტული ფაქტები მითხრან, თუ რაში ვუშლიდი ხელს, რომ წარმატებისთვის მიეღწიათ”, - განაცხადა ქევხიშვილმა.