საქართველოს მთავრობამ ,,ბიოწარმოების შესახებ“ შემუშავებული დადგენილება მიიღო

ბიზნესი & ეკონომიკა - 19:49, 08 Aug, 2013

986

დადგენილების მიზანია საქართველოში სოფლის მეურნეობის მართვის მდგრადი სისტემის შექმნა, რომელიც ხელს შეუწყობს ქვეყნის ბიომრავალფეროვნების შენარჩუნებას, გარემოს დაცვას, ბუნებრივი რესურსების ეფექტიან გამოყენებას, მომხმარებელთა ინტერესის დაცვას და ქვეყნის საექსპორტო პოტენციალის გაზრდას. პროექტი ასევე ითვალისწინებს იმ მწარმოებლების დაცვას, რომლებიც აწარმოებენ ბიოპროდუქციას (პროდუქტს რომლის ეტიკეტზე/ნიშანდებაზე დატანილია სიტყვები - ,,ბიო", ,,ორგანული", ,,ეკო"). აღნიშნული დადგენილების მიღება ქართული პროდუქციის ექსპორტის მნიშვნელოვან ზრდას განაპირობებს.

ბიოპროდუქციის წარმოება ფერმერს მეტი შემოსავლის მიღების საშუალებას მისცემს, რადგან მსოფლიოს ნებისმიერ ქვეყანაში აღნიშნული პროდუქცია ძვირადღირებულია და საერთაშორისო ბაზარზე მასზე საკმაოდ დიდი მოთხოვნაა. აქედან გამომდინარე, საქართველოს აქვს შესაძლებლობა დაიკავოს ეს ნიშა. აღსანიშნავია ისიც, რომ ქართული ბიოპროდუქტი, ქვეყნის გეოგრაფიული მდებარეობიდან და კლიმატური პირობებიდან გამომდინარე გამოირჩევა თავისი გემური თვისებებით.

სოფლის მეურნეობის სამინისტრო აქტიურად მუშაობს ბიომრავალფეროვნების აღდგენა-შენარჩუნებისა და ბიოწარმოების ხელშეწყობის მიმართულებით, რასაც აღნიშნული დადგენილების შემუშავებაც მოწმობს.

,,ბიოწარმოების შესახებ" მთავრობის დადგენილება, რომელიც საქართველოს კანონის - ,,სურსათის/ცხოველის საკვების უვნებლობის, ვეტერინარიისა და მცენარეთა დაცვის კოდექსის" 75-ე მუხლის მოთხოვნის შესაბამისად შემუშავდა, მოიცავს წესებს, რომლითაც განისაზღვრება ბიომეურნეობის მართვა, ბიოპროდუქციის წარმოება, გადამუშავება, ნიშანდება, ეტიკეტირება, დისტრიბუცია, რეალიზაცია, ასევე ბიოწარმოების ნებაყოფლობითი სერტიფიცირება.