"დამიჭერენ? დამიჭირონ, მომკლავენ? მომკლან... შვილი მომიკლეს და კიდევ მე მადანაშაულებენ"- დავით სარალიძე

საზოგადოება - 09:52, 20 Apr, 2018

15865

ხორავას ქუჩაზე მოკლული არასრულწლოვნის მამის, ზაზა სარალიძის თქმით, მას ადანაშაულებენ, რომ ვიღაცის ზეწოლის ქვეშ, ან ვიღაცის აზრებიდან გამომდინარე ითხოვს დანარჩენი ბრალდებულების გამოაშკარავებას. მისი თქმით პროკურორები მას კონკრეტული პირების ინტერესების გატარებაში სდებენ ბრალს. აღნიშნული განცხადება ზაზა სარალიძემ გუშინ გამართული სასამართლო პროცესის შემდეგ გააკეთა.

„მე მთხოვეს პირდაპირ – მომეცი არგუმენტი, რომ დავაკავო ეს პირები. თუ არგუმენტი მაქვს და მე საბუთი მაქვს, ესე იგი მე ვარ პროკურორი და გამომძიებელი. კონკრეტულად მაინტერესებდა მიხეილ კალანდიასთან დაკავშირებით, თუ რატომ არ იყო დაკავებული იმის გამო, რომ პროცესზე ჩვენება შეცვალა. დღესდღეობით, როდესაც უკვე სრულწლოვანია, გადის სასამართლო პროცესზე და ამბობს ბრალდების საწინააღმდეგო ჩვენებას, მეორე პროცესზე უკვე გამოდის და ამბობს დაცვის საწინააღმდეგო ჩვენებას, პირდაპირ მიმყარებს საფუძველს, ვიფიქრო, რომ მიხეილ კალანდია არის ერთ-ერთი დამნაშავე. პირდაპირ მკვლელობაზე მაქვს საუბარი. ზოგი ადასტურებს კალანდიას იქ ყოფნას, ზოგი არ ადასტურებს, იმიტომ, რომ ზეწოლა მოახდინეს აბსოლუტურად ყველაზე. ფარდულის ამბებში ფიგურირებს კალანდია, ფარდულში ფიგურირებენ ჯანაშია, მენაბდე, რომლებიც დაკითხულები არიან, ჯანაშიას გარდა. მენაბდე დაჭრილი არის ამ ინციდენტის გამო. ჯერჯერობით გამოუძიებელია, ვისგან არის დაჭრილი და რა პოზიციაში და რა იარაღით. მენაბდის დაკითხვა დასრულდა თუ არა, იმ დღესვე დადეს ექსპერტის ცნობა, რომ მენაბდის ტანსაცმელზე აღმოჩნდა ჩემი შვილის სისხლი, რამაც გამოიწვია ძალიან ბევრი კითხვა. სამწუხაროდ, ამ კითხვებს ვეღარავინ დაუსვამს მენაბდეს იმიტომ, რომ მისი დაკითხვის პროცესი დამთავრებულია. პირდაპირ მაყრის პროკურატურა თვალებში ნაცარს. მაფურთხებენ სახეში, ასე რომ ვთქვათ. არ დავუშვებ, რომ ეს საქმე ასე დარჩეს. დამიჭერენ? დამიჭირონ. მომკლავენ? მომკლან. ვიღაცა მაინც გამოჩნდება, რომ ეს საქმე გააგრძელოს ბოლომდე და მიიყვანოს იმ კონკრეტულ პირებამდე, ვისაც ხელს ადებს თუნდაც პროკურატურა, თუნდაც სუბელიანი და თუნდაც კაკუბავა. პროკურორებთან ვიყავი ასული და აქეთ დამადანაშაულეს, თითქოს ვიღაცის ინტერესებს ვიცავ და ვიღაცის ინტერესებიდან გამომდინარე ვსაუბრობ იმას, რომ კიდევ ორი მკვლელი გარეთ დადის. თუ ვის ინტერესებს ვიცავ, ამას კონკრეტულად არ მეუბნებიან. მხედველობაში აქვთ ან ზვიად კუპრავა ან დაცვის მხარე. მე შვილი მომიკლეს და კიდევ მე მადანაშაულებენ იმაში, რომ ვიღაცის ნათქვამზე დავდივარ." - განაცხადა სარალიძემ.