„იფქლის“ პურის ნაჭერზე აღმოჩენილი უცხო სხეული საღეჭი რეზინი აღმოჩნდა

საზოგადოება - 14:31, 18 Apr, 2018

2601

16 აპრილს სოციალური ქსელის ერთ-ერთმა მომხმარებელმა საკუთარი „ფეისბუქის“ გვერდზე გამოაქვეყნა „იფქლის“ პროდუქტის ფოტო, სადაც პურის ნაჭერზე არსებული უცხო სხეული იყო გადაღებული.

"ფოტოს გამოქვეყნებიდან ერთ საათში მომხმარებელს „იფქლის“ ხარისხის უზრუნველყოფის სამსახურის თანამშრომელი დაუკავშირდა საკითხში გასარკვევად. მომხმარებელმა კომპანიას უარი განუცხადა პროდუქტის ლაბორატორიაში გაგზავნაზე, რადგან „სურსათის ეროვნული სააგენტოს“ წარმომადგენლის ვიზიტს ელოდა. მხოლოდ მეორე დღეს გახდა შესაძლებელი პროდუქტის ადგილზე ნახვა, სადაც ნათელი გახდა, რომ უცხო სხეული საღეჭი რეზინის ნაწილი იყო.

საღეჭი რეზინი არ იყო პროდუქტში ცხობის დროს ცომში მოხვედრილი. უცხო სხეული პურის ქერზე მოგვიანებით მოხვდა. შესაძლოა ის პურზე პროდუქტის შეფუთვის დროს მოხვდა, თუმცა ამის დანამდვილებით თქმა ჯერ-ჯერობით შეუძლებელია. ცხობის, ისევე როგორც შეფუთვის პროცესი კომპანიაში სრულად იზოლირებულია, ამიტომ რთულია დაზუსტებით ითქვას როგორ მოხვდა საღეჭი რეზინი შეფუთულ პურში. კომპანიის გუნდი ცდილობს ტექნიკური საშუალებების დახმარებით გაერკვეს სიტუაციაში და გატარდეს შესაბამისი ზომები. საკითხის გარკვევაში ჩართულია როგორც „იფქლის“ წარმოების, ისე ტექნიკური უზრუნველყოფის სამსახურები.

კომპანია „იფქლი“ მჭიდროდ თანამშრომლობს სურსათის ეროვნულ სააგენტოსთან და ყოველთვიურად გადის როგორც გეგმიურ, ისე არაგეგმიურ შემოწმებებს. საწარმო სრულად აკმაყოფილებს კანონით დადგენილ სტანდარტებს" - აღნიშნულია "იფქლის" მიერ გავრცელებულ ინფორმაციაში.