მოსახლეობა ტანძია-ჩიტარეთის გზაზე „RMG Gold“-ის სატვირთო მანქანებს მუშაობის შესაძლებლობას არ აძლევს

საზოგადოება - 15:26, 13 Apr, 2018

1116

ტანძია-ჩიტარეთის საავტომობილო გზის მონაკვეთზე აქცია მიმდინარეობს. ადგილობრივმა მოსახლეობამ დღეს გზა დილიდან გადაკეტა. ისინი კარიერების მშენელობას აპროტესტებენ.

აქციის მონაწილეებმა დღეს, „RMG Gold“-ის სატვირთო მანქანებს გადაადგილების საშუალება არ მისცა. მათი თქმით, რეგიონში ისედაც მძიმე ეკოლოგიურ მდგომარეობას კარიერების მშენებლობა უარესად დაამძიმებს.

„აპირებენ ღია კარიერის ამოქმედებას, რაც ჩვენი ჯანმრთელობისთვის კი არა სიცოცხლისთვის არის საფრთხე. ჰაერზე რომ გაზომოთ ჩემი სახლიდან 800 მეტრი იქნება. ამიტომ გადავკეტეთ გზა და სანამ არ გაჩერდებიან და სანამ არ დავრწმუნდებით, რომ აღარ აპირებენ მუშაობას ჩვენც გავჩერდებით. იყვნენ გუშინ ამოსული „RMG”-ის წარმომადგენლები, დღესაც ველოდებით. თუ ისევ ისინი ამოვიდნენ ვინც გუშინ იყვნენ, მათ არ მოვუსმენთ. იმიტომ რომ გუშინ დაგვცინოდნენ. გვითხრეს, ვინ მოგახსენათ, რომ უცებ კლავს ადამიანსო? - უცებ არა დროთა განმავლობაშიო" - აღნიშნავს აქციის მონაწილე ვეფხვია ღვალაძე.

მოსახლეობის თქმით, „RMG Gold“-ის წარმომადგენელი პროტესტის შეწყვეტის სანაცვლოდ სამუშაო ადგილებსა და კომპენსაციებს დაჰპირდა.