რესპუბლიკურ საავადმყოფოში აცხადებენ, რომ ერთ-ერთი დაჭრილის მდგომარეობა მძიმეა - ფილტვში მიყენებული ჭრილობის გამო მას გვიან ღამით ოპერაცია ჩაუტარდა.
სისხლიანი ანგარიშსწორების შედეგად საავადმყოფოში სულ 5 ადამიანი მოხვდა.
დაჭრილთა ახლობლები მომხდარის ზუსტ მიზეზებზე ვერ საუბრობენ. შს სამინისტროს ოფოციალური ინფორმაციით კი ინციდენტი ურთიერთშელაპარაკების ნიადაგზე მოხდა.
თვითმხილველების ნაწილი კი ამბობს, რომ გასროლა მიმავალი ავტომობილიდან განხორციელდა.
სახელდება BMW მარკის შავი ავტომობილი, რომლის მძღოლი ადგილიდან მიიმალა.
გამოძიება სისხლის სამართლის ორი მუხლით მიმდინარეობს - 19-109-ე მუხლით, რაც დამამძიმებელ გარემოებაში განზრახ მკვლელობის მცდელობას გულისხმობს და 236-ე მუხლით, რაც ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვა-ტარებას გულისხმობს.
როგორც ირკვევა დაჭრილებს შორის მორაგბე ლაშა საჯაია, მისი ძმა, სპორტსმენის შეყვარებული და კიდევ ორი მეგობარია.
როგორც დაჭრილი საჯაიების მამა აცხადებს, შვილებს ესაუბრა, თუმცა მათ არ იციან ვინ და რა მოტივით გაუხსნათ ცეცხლი.
“აზრზე არ არიან, ვიღაც იდიოტები არიან. თავისით მიდიოდნენ და ცეცხლი გაუხსნეს, ამბობენ, ნეტა ვიცოდეთ ვინ და რა მიზეზით გვესროლა. როგორ შეუძლიათ ასე მარტივად, ესროლონ ვიღაცეებს?!“- აცხადებს დაჭრილი მორაგბის მამამ.
მეზობლების თქმით, მათ მხოლოდ გასროლის ხმა არ გაუგიათ.
„როგორც თქვეს, ავტომობილიდან გაუხსნეს ცეცხლი, მძღოლს არც კი გაუჩერებია. ჩვენი უბნელები არ არიან. შეიძლება წარსულში რაიმე სახის უთანხმოება ჰქონდათ, აბა ერთად როგორ შეიყარა ეს ხალხი?! ასე ერთად როგორ გამოიჭირსეს და ესროლეს?!“- ამბობენ ადგილობრივი.
გვიან ღამით დაჭრილი ოთხი ახალგაზრდა კვლავ რესპუბლიკურ საავადმყოფოში რჩება.
ექიმის, ზვიად ძნელაძის განცხადებით, ერთ-ერთი დაშავებული – გოგონა მსუბუქად იყო დაჭრილი, რომელიც მალევე გაწერეს, ოთხ ახალგაზრდა მამაკაცს კი ქირურგიული დახმარება დასჭირდა. მათ ცეცხლსასროლი იარაღით მიყენებული ჭრილობები აღენიშნებოდათ.
სამედიცინო დახმარების შემდეგ, ორი პაციენტი რეანიმაციულ განყოფილებაში რჩება, ორი კი პალატაშია გადაყვანილი.
მასალის გამოყენების პირობები